Gawai Tuah pemadu beguna ba tusun adat Iban

TATAU: Enda mayuh komuniti nemu silik pasal Gawai Kelingkang enggau Gawai Tuah ke suah diatur ninting pun taun baru, ku Datuk John Sikie Tayai.
Menteri Muda Ba Opis Kepala Menteri, Undang-Undang Enggau Adat Bumiputera nya madah tuju pengerami nya diatur dikena namaka tuah enggau minta diberekat Petara ngulihka jereki sereta pengerai ke lebih manah.
“Kebendar kededua pengerami tu diatur berengkah 7 Januari ninting taun dipunka enggau pengawa beranchau puang.
“Udah nya, pengawa nimang ke dikemujur bala lemambang semalam-malam sampai hari siti lalu ditampung enggau pengawa namaka tuah.
“Taja pia, pengerami Gawai Kelingkang diatu nyau jarang dikereja di Tatau lalu tu mayuh sida ke nembiak nadai kala meda,” ku iya.
Sikie ke mega Adun Kakaus madah munyi nya maya ngulu Pengerami Gawai Kelingkang enggau Gawai Tuah di Rumah Gilbert Ngadi, Kelawit, Tatau kena Hari Enam tu tadi.
Nya alai, ku sikie ngelansa pasal Gawai Kelingkang enggau Gawai Tuah, Lemambang Melayu Lasu ari Rumah Steven Intai, Sungai Poi, Kanowit bisi nerangka ngagai iya pasal kededua pengerami tu beguna amat ba bansa Iban kelimpah ari sekeda gawai bukai.
Kenu ku Lemambang Melayu, dalam tusun adat Gawai bansa Iban, pengerami Gawai Tuah ke pemadu beguna.
“Kebuah pia, laban enti kitai ngembuan tuah ke manah, dia kitai deka bulih pengaya, pengeraja, muntang ngulihka jereki sereta bulih pengerai enggau pengayu.
“Udah nya, pengerami Gawai bukai mega ulih dikereja baka Gawai Kelingkang enggau Gawai Kenyalang,” ku iya. -Ukas