GEDONG: Pelilih Menua Gedong udah tu deka terus dikemansang awakka ulih nyadi mengeri satelit disikap enggau perengkaguna penyambung dikena ngerapitka takah pemansang entara Samarahan enggau Kuching.
Kepala Menteri Datuk Patinggi Tan Sri Abang Johari Tun Openg madahka pekara tu ditukuka pengudah iya mansik tunga tuju pemansang enggau chura nengah jalai nyengkaum jalai pesisir, ekonomi, dagang temuai, pesaka Gedung, Simunjan enggau palan besemak.
“Baka ti ditemu kita, ba Kota Samarahan bisi palan pelajar tinggi, palan pansik enggau jalai penyambung baka Jematan Sejingkat ti deka ngasuh Gedong nyadi sebuah pasar besai di menua pesisir.
“Palan menua pesisir tu ila deka diubah nyadi sitak moden mandangka pemanah rampa menua Sarawak,” ku iya.
Abang Johari bejaku munyi nya rambau Bejadika Gedong Nyadi Pelilih Menua ditu, kemari.
Ku iya, dalam meri servis ti lebih manah ngagai rayat bisi lima buah pelilih menua enggau sebuah pelilih menua mit baru ditumbuhka ba Bagi Menua Samarahan, Serian enggau Sri Aman.
“Lima buah pelilih menua tu iya nya Pelilih Menua Siburan, Gedong, Sebuyau, Lingga enggau Pantu.
“Kelimpah ari nya, sebuah pelilih menua mit iya nya Pelilih Menua Mit Balai Ringin mega ditumbuhka.
“Infrastruktur ba Pelilih Menua Gedong deka seikas enggau pelilih menua bukai baka pemesai pelilih menua, engka mega deka bisi Kaunsil Pelilih Menua endur kitai nyirika raban kaunselor,” ku iya.
Chalun Gempung Parti Sarawak (GPS) ba Dun Gedong tu mega madahka lebuh udah nyadi sebuah mengeri satelit deka bisi hotel, homestay enggau servis bukai digaga ba palan nya ila.
Sama bisi datai Menteri Dagang Temuai, Seni enggau Main Asal Datuk Sri Nancy Shukri, Sekretari Perintah Nengeri Datuk Amar Jaul Samion, Menteri Muda Dagang Entarabansa enggau Industri, Terminal enggau Pemansang Orang Dagang Datuk Mohd Naroden Majais enggau ke bukai.
Ungkup penemu reti mengeri satelit tu iya nya mengeri ke bepanggai ngagai industri dalam menua, tang bisi kaul enggau ekonomi sereta ngembuan sambung jalai raya ke menyana dikena ngemuntangka pengawa ngelawa sesebuah mengeri bukai ke besemak.
