Gela ‘Datuk’ mai reti orang pechaya kitai ulih gawa – Datuk Ali Biju

PUTRAJAYA: Sepenyampau 335 iku penerima Darjah Kebesaran (Tanda Basa), Bintang enggau Pingat beserimbai enggau Hari Wilayah Persekutuan 2021.

Entara penerima nya, Sapit Menteri Pengeluar Kuasa enggau Pengeraja Asal, Ali Biju ke nerima Darjah Kebesaran Panglima Mahkota Wilayah (P.M.W) ke mai gela Datuk.

Ali madahka pengaga diri lebuh diberi tanda basa begulai enggau bala pemesai perintah bukai nyengkaum bakih iya, Sapit Menteri Pengawa Bekebun enggau Komoditi, Willie Mongin ke mega bulih gela Datuk.

Iya madah, tanda basa diterima nya mandangka Opis Menteri Wilayah Persekutuan ngenang enggau ngaku jasa bala pemesai sereta orang ti nyaup perintah ngemansangka menua.

“Aku berasai gaga enggau temegah ati laban dipilih entara penerima Darjah Kebesaran Hari Wilayah Persekutuan sekali tu.

“Puji Tuhan ngagai berekat diberi iya ngagai aku enggau semua rayat Sarawak kelebih agi di Pelilih Saratok.

“Ba aku empu, gela diterima nya mai reti orang pechaya enggau andalka kitai ulih ngereja pengawa.

“Nya kebuah aku ngasaika gela tu mai tanggung pengawa ke besai, chukup berat lalu pangku pengawa mega tentu deka betambah udah tu,” ku iya lebuh dirandau Suara Sarawak, sehari tu.

Ungkup penerang, haribulan Istiadat Pengurniaan Darjah Kebesaran, Bintang enggau Pingat tu benung diperambu laban berundingka pengerekai Covid-19 lalu deka dipadah ngagai bala penerima ila.

Nambahka nya, Duli Yang Maha Mulia Seri Paduka Baginda Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah Ibni Almarhum Sultan Haji Ahmad Shah Al-Musta’in Billah udah setujuka Darjah Kebesaran, Bintang enggau Pingat diberi ngagai 335 iku penerima nya.

Taja pengerami nyuaka tanda basa nya apin dipejalai tang seriris enggau agih di baruh Statut Darjah Yang Mulia Mahkota Wilayah, sida dikemendar ngela gelar nya.

Ngena peluang nya, Opis Menteri Wilayah Persekutuan meri tabi puji ngagai pemanah pengawa enggau jasa bala penerima tanda basa sekali tu.

Suara Sarawak