Gela ‘Datuk’ ukai batang tuju Pandelela

KUCHING: Atlit terejun menua, Pandelela Rinong Pamg, 28 madahka ngulihka gela ‘Datuk’ ukai batang tuju ati iya tauka sida sebilik tang semua pemujur ke dijapai sehari tu ketegal endang rinduka pengawa lumba sereta deka ngemanahka japai rikod.

“Semua orang deka ngulihka penyulut dalam bidang sida lalu pia mega aku. Aku nerima aja sebarang aja bonus tauka insentif ke diberi perintah lalu aku chukup beterima kasih.

“Pia mega enggau bonus, aku nerima semua tu nyadika berekat enggau penuh pengaga ati nadai ngira penyampau,” ku penerang Pandelela nyaut tanya lebuh dirandau New Sarawak Tribune bekaul enggau isu gela ‘Datuk ke benung angat dikejaku ba sebelah media rama.

Berebak enggau nya, Pandelela madah orang ke melanja (sponser) nyengala mantu raban atlit laban nya deka ulih nyendiaka penatai pemisi tambah ngagai sida.

“Bantu nya mega tau dikumbai sebagi ari batang pengawa lalu tu ulih mantu enti kitai udah pinchin,” ku iya.

Dulu ari tu, Pandelela mujur bulih midul emas nengah main terejun 10 meter peninggi kategori kediri ba Pekit Trofi Dunya Terejun Fina di Tokyo, Jipun kena 5 Mei tu tadi.

Taja pia, Menteri Nembiak enggau Lumba Sarawak Datuk Abdul Karim Rahman Hamzah mansutka penemu madah kelalu tumu nyema deka meri gela nya ngagai Pandelela.

Nya alai, penemu Karim nya balat dipejah mensia mayuh nyengkaum NGO ti minta gela ‘Datuk’ endang diberi ngagai Pandelela awak nyadika peransang enggau kelai basa ngagai iya ti udah bebendar ngangkatka nama Malaysia ba tikas dunya.

Suara Sarawak