SARATOK: Bajik memelan, pintar enggau landik niu jaku bebungai sereta kreativiti endu Olvin Alexandra anak Moses narit ati mensia mayuh milih iya nyadi Kumang Gawai Online Trofi YB Datuk Ali Biju 2022.
Iya bulih 5.240 undi ngalahka semilan pemekit bukai ba renggat kepenudi pekit ti diatur nengah tali arus tauka online.
Pemutus pekit dibantai urung pukul 8.40 malam tadi nengah Facebook Rasmi YB Datuk Ali Biju empu.
Cynthia Jaby anak Entuni bulih gelar Lulong seraya endu bajik Clara Presilia anak Moses menggi gelar Selinggar Matahari.
Berindik ari nya, endu Olvin mai pulai perais mata duit RM10,000, kelimpah ari Trofi YB Datuk Ali Biju, Jumpang enggau perais ke bukai.
Enggau nya, Kaban Parlimen Saratok, Datuk Ali Biju meri pengaga ati enggau tabi puji ngagai semua pemenang enggau bala pemekit ti udah ngemujurka pekit diatur taun kedua tu.
