Gelar Raja Sungai Oya 2019 dipenggi ‘Warisan Permata’

DALAT: Perau bidar ti benama ‘Warisan Permata’, diempu Aini Hussin ari Kampung Penat, Oya bulih gelar Raja Sungai Oya ba lumba kepenudi Raja Sungai 30 Pekayuh Lelaki beserimbai Mini Regata Oya 2019 ba Batang Oya tu tadi.

Ari enam buah perau bidar ba renggat kepenudi lumba perau kategori lelaki, Pahlawan Senau empu Shuib Janji ari Kampung Senau bulih penuduk lumur dua, Pahlawan Negara diempu Julaihi Tuna bulih penuduk lumur tiga lalu Syiling Malaysia, Panca Delima Dua enggau Sri Dahaga Satu ba penuduk belakang.

Sakai perau bidar enggau urang ti ngempu perau ba penuduk tiga ke atas ngangkatka sebuah trofi lalu nerima duit ti disuaka Datuk Sri Hajah Fatimah Abdullah, Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit ti nyadi Kaban Kaunsil Nengeri (ADUN) N56 Dalat.

Lebih 50 buah perau bidar peranak ba Pelilih Dalat mega bisi nyereta ba Lumba Perau Bidar, Mini Regata Monsoon Oya 2019 ti bepekit ba mayuh bengkah kategori baka 15 sakai campuran, 20 sakai beraban, 20 sakai lelaki, perau Tangsi 7 sakai lelaki, 30 sakai lelaki enggau mayuh agi.

Ba lumba Bot Laju , bot benama String Ray 82 mujur ba lumba kepenudi 50 kuasa kuda, Murum Jaguar ba penuduk kedua lalu John Racing 68 ba penuduk ketiga.

Ba lumba bot laju 18 kuasa kuda Tunnel Hull kepenudi Pesaka 29 ba penuduk keterubah, John Racing 99 kedua lalu KBRT 15 ba penuduk ketiga.

Ba lumba kepenudi bot laju 30 kuasa kuda, dua piston Tunnel Hull, Sri Lajong 78 mujur teulihka penuduk keterubah, String Ray 96 ba penuduk kedua lalu Sago 35 ba penuduk ketiga.

Semua ti mujur ba lumba bot tu deka diberi duit enggau trofi.

Bisi ngulu pengawa tu ba hari nangguhka pengerami iya nya Kueh Lei Poh, Pemesai Pelilih Dalat, Temenggong Hendi Suhai, Chairman Komiti Pengatur Pengawa Mini Regatta Oya 2019, Kenel Jaraiee enggau Abu Seman Jahwie, Sekretari Politik Kepala Menteri Sarawak sereta Zakaria Idris, pengari Opis Regista Menua Nengeri Sarawak.

CHAMPION…Sakai perau bidar Warisan Permata bulih gelar Raja Sungai Oya 2019 begambar kenang gaga ati bulih lumur keterubah.