KUCHING: Pengerami Ngiling Tikai Gawai Dayak Dewan Bandaraya Kuching Utara (DBKU) tu dikeandal ulih nerenak semangat penyerakup pupu bansa.
Datuk Bandar Kuching Utara Datuk Junaidi Reduan madah, genap pengerami ti diintu nya bisi pengelebih laban ulih nerenak pemereti ati sesebuah etnik.
“Penyerakup engggau penegap menua Malaysia diatu berekat semangat kerejasama ari semua raban bansa.
“Pengawa bebaik enggau pangan diri entara kunchi nempa penyerakup ti tegut,” ku iya.
Ku iya, semua orang beempu tanggung pengawa besai ngetanka semanggat bebaik enggau bebasaka pangan diri.
Nya kebuah, pengerami tu nyadika chunto ngedutka agi semangat beserakup entara rayat kelimpah ngerapit kaul entara staf DBKU.
“Aku pechayaka pengerami baka tu mega ulih mantu nempa semangat kereja beraban nadai ngira raban bansa enggau jalai pengarap,” ku iya nerang.
Ngelansa silik, iya madah taun tu diberi peluang ngatur Pengerami Ngiling Tikai pengudah dua taun pandemik.
“Pengerami tu dikena ngintu Pengerami Nutup Gawai Dayak sereta bekunsika pengelantang nadai ngira raban bansa tauka jalai pengarap,” ku Junaidi.
Nangkan nya, Tuai Gawai Pengerami Ngiling Tikai Gawai Dayak DBKU 2022 Durie Austine Tinggie madahka diri gagit ati diberi peluang ngintu pengerami nya enggau bala bakih sereta bala bukai.
Ku iya, rambai jaku pengerami nya, Segulai Sejalai mai reti sama ngemansangka siti tuju lalu nipakka menua Sarawak diuan pupu bansa enggau diau lantang enggau pangan diri.
“Pengerami tu diatur ngambi nerenak semangat kerejasama enggau bebaik enggau semua orang.
“Kelimpah ari nya, pengerami tu mega nyadi pelasar nyerakup komuniti enggau ngerapit kaul staf ba palan gawa,” ku Austine.
Nya alai ku iya, pengerami tu mai besai reti ngagai semua kitai pengudah dua taun enda berami ketegal pandemik Covid-19.
