ARTIKEL

Geopark nyungkak dagang temuai

Facebook
Twitter
LinkedIn
WhatsApp
Telegram

KUCHING: Perintah Sarawak bisi juluk deka meda Delta Sarawak nyadi UNESCO Global Geopark (UGGp) laban geopark nya ulih nyungkak pemansang ekonomi rama menua.

Sapit Premier, Datuk Amar Awang Tengah Ali Hasan madah sekeda juluk strategik besai geopark nya ngambi meransang pengawa ekonomi ba langgur pemansang meruan.

“Kelai geopark tu deka ngangkat agi industri dagang temuai di Sarawak seraris enggau pemujur menua tu ngintu pesaka rampa menua.

“Kitai deka ngemansang taba geo nyadi sebagi ari pengawa nempa kelai geopark kitai ti ulih nyungkak ekonomi rama nyengala ngagai komuniti lokal sereta mungkal mayuh agi peluang gawa enggau kereja,” ku iya.

Awang tengah mansutka jaku nya beserimbai penemuai iya ngagai Korea Selatan.

Menteri Pengeraja Asal enggau Pemansang Menteri Kedua nya madah, inisiatif nya mega deka ngaul pengawa ngintu enggau nyaga pengeraja asal sereta pesaka main asal seraya ngulih sereta ngangkat penatai pemisi rayat.

“Kitai bisi ai wong, bukit, gua enggau tebing tasik ti ulih diangkat enggau nempa kelai geopark,” ku iya.

Tuju nempa kelai geopark dikena ngelaku palan pemataktemuai ari menua tu empu enggau ngaul pun penatai geologi ti nyelai, bemacham naratif komuniti ti ngelingi, pemakai nyelai ti diasil ba taba geo enggau siti program sereta pengawa ti ngena pemaik rampa menua, sejarah, pemakai enggau cherita rayat sereta main asal penteba geologi.

Lebuh nemuai ngagai Korea Selatan, Awang Tengah bisi nemuai ngagai UGGp Pulau Jeju lalu tekait ati enggau infrastruktur, fasiliti sereta akses ngagai taba nya iya nya ‘Manjanggul Lava Tube’, jalai Geo Gimnyeong, Bukit Sanbangsan, Pantai Yongmeori enggau ‘Suwolbong Tuff Ring’.

“UGGp Pulau Jeju nunjuk ngagai kitai, iya nya geopark ti ulih dipeda beguna amat dikena matak temuai enggau ngelaku penteba geologi ti nyelai.

“Papan kelai enggau jaku salin pasal geopark beguna amat dikena ngembing temuai sereta nambah pemereti sida pasal penteba pesaka geologi, biologi enggau main asal,” ku iya.

Iya nyebut pasal guna Sarawak nitih chunto UGGp Jeju dikena ngangkat penyambung enggau penatai ngagai palan geo ba nengeri tu.

Sama nyempulan Awang Tengah iya nya Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah, Sapit Menteri Pengeraja Asal enggau Pemansang Mengeri, Datuk Len Talif Salleh sereta Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan.

BERITA LAIN

BERITA TERBARU