SARATOK: Bantu belanja enggau geran ari Perintah Besai deka diagih berenggat nitihka penyampau dipinta ti patut setipak enggau tuju peminta komuniti menua nya.

MP Saratok Ali Biju madah, mayuh peminta datai ari kaban serakup enggau gempung nyengkaum JKKK bisi diterima Palan Servis Komuniti P205 Saratok.

“Bantu enggau geran tu enda ulih diberi kitai semua tekala nya laban dibagi ngambika serap komuniti bela ampit ngasaika pemansang ti diberi perintah besai.

“Belanja tu mega dikena kitai bejalaika pengawa pemansang bukai ti pulaika pemaik bala komuniti nyengkaum dikena ngintu pengelantang sereta mantu sida ti tasah dituntung penusah ngenyit.

“Nya kebuah kitai patut bebatak asur enggau sabar nganti gintir diri nerima bantu,” ku Ali madah nyemetak.

NERANG… Ali bejaku ba mua mayuh rambau atur pengawa nyuaka chek geran diatur ba Palan Servis Komuniti P205 Saratok ensanus.

Ali mansutka jaku tu rambau atur pengawa nyuaka chek geran sepenyampau RM223,000 ngagai 14 penerima datai ari kaban serakup, gerempung enggau JKKK menua nya, kemari.

Ngenang pekara bisi sekeda gempung tauka serakup ti apin nerima bantu sida ketegal sekeda penanggul baka akaun enggau ke bukai, Ali minta sida mutarka penanggul nya dulu sereta patut berandau enggau sida ti gawa ba Palan Servis Komuniti ke bisi dia.

“Polisi perintah diatu udah berubah pengudah perintah besai bekalih, nya kebuah bisi atur baru patut ditangkup ngambika peminta sida ulih dipujur kami ke nyadi pengari.

“Palan servis tu mega enda ngaul opis di baruh pegai Perintah Nengeri laban bisi atur enda sebaka enggau Perintah Besai, nya kebuah atur pengawa meri geran tu dipejalai ditu,” ku Ali nerang.

Berebak enggau nya, Ali mega bisi nyebut pasal gempuru besai ngintu Gawai Dayak ungkup taun tu.

UNGKUP RAYAT… Ali nyuaka chek geran pemansang ngagai siku ari pengari penerima.

“Bisi dua gempuru besai deka diatur dikena ngerami hari besai kitai ti deka diatur ba Rumah Dayak SDNU Saratok enggau ba rumah panjai di Rumah Anchang, Sungai Muding .

“Pekit Kumang Saratok diatur SDNU Saratok renggat Bagi Menua Saratok kena 18 Mei seraya Pekit Kumang Krian diatur rumah panjai kena lemai 25 Mei. Aku deka datai ba kededua batang pengerami tu, nya pemanah atur pengerami kitai taun tu.

“Kitai bela sampal datai berami, rindu begulai enggau pangan diri seraya ngayanka kaul kerejasama rat kitai bansa,” ku Ali nyimpul randau enggau Suara Sarawak ditu ngalihari kemari.

PENGINGAT… Ali begambar enggau bala penerima pengudah tembu nyuaka chek geran ari Perintah Besai.