Gerija baru St Francis lantang endur sembiang

“Kami beterima kasih ngagai Unifor ti udah meri bantu belanja RM1 juta ba taun 2017 dalam nirika begunan gerija baru tu.”

KOTA SAMARAHAN: Begunan baru Gerija St Francis beungkus RM5 juta dipenyadi Bishop Gerija Anglikan Sarawak enggau Brunei Darussalam Rt Revd Danald Jute, kemari.

Vicar Gerija St Francis, Revd Canon Dennis Gimang madahka penumbuh begunan gerija baru nya berindik ari penyampau tubuh Kristian pegai gerija nya majak nambah ninting taun.

“Enti nitihka penyampau tubuh ke ulih nampung pemesai begunan gerija lama suba urung 350 iku aja.

“Tang ba begunan ke baru tu disadang ulih muat urung 1,200 iku Kristian ba pelilih Kota Samarahan,” ku iya.

CHUKUP MANAH… Begunan baru Gerija St Francis Kota Samarahan ulih nampung 1,200 iku raban Kristian pelilih Kota Samarahan.

Revd Dennis madah munyi nya lebuh dirandau Suara Sarawak ba Gerija St Francis ditu, kemari.

Nangkan nya ku iya, sida udah ngaga mayuh pekara dikena nampung pemayuh tubuh raban Kristian ke besembiang ba gerija nya.

“Taja pia, nya mengkang enda ulih namoung pemayuh raban Kristian ba pelilih Kota Samarahan nyengkaum bala nembiak ke belajar ba Unimas enggau UiTM.

“Tu mih kebuah kami berundjng nirika begunan baru tu ngambika semua ke semak pelilih menua tu ulih besembiang enggau lantang ,” ku iya.

Udahnya ku Revd Dennis, taja baka ke udah tembu penuh, sida mengkang begunaka belanja RM3 juta dikena nyendiaka gerija nya enggau mayuh perengka guna.

Ngelansa pun penumbuh gerija nya, Revd Dennis madahka raban Kristian pelilih Kota Samarahan kelebih agi sida ke ngena gerija nya alai besembiang mayuh udah meri bantu nirika begunan baru nya.

“Keterubah kami berunding deka numbuhka gerija tu suba, kami minta tiap ruang bilik meri bantu belanja nitihka pemisi diri.

“Puji Tuhan laban nengah pengawa nya kami mujur ngumpul belanja ba taun 2015 lalu nampung baru pengawa ngumpul belanja nya ba taun 2016,” ku iya.

Ku Revd Dennis, kebuah sida ngumpul belanja ari raban Kristian pelilih menua nya laban sida enggai bepanggai ba bantu orang bukai.

“Enda patut alai kitai minta bantu ba orang bukai enti kitai empu enda ulih mantu gerija kitai empu,” ku iya madah nyemetak.

Kelimpah ari bantu raban Kristian pelilih Kota Samarahan, begunan baru Gerija St Francis mega nerima bantu ari Unit Pekara Pengarap Bukai (Unifor).

“Kami beterima kasih ngagai Unifor ti udah meri bantu belanja RM1 juta ba taun 2017 dalam nirika begunan gerija baru tu,” ku iya.

Nitihka penerang, Gerija St Francis Kota Samarahan bisi tiga misa Hari Minggu alai sembiang Jaku English (pukul 6.45 pagi) ulih ngungkupka 350 iku, sembiang Jaku Iban (pukul 8.30 pagi) ulih ngungkupka urung 700 iku lalu sembiang Jaku Melayu (pukul 5.30 lemai) diungkup ngagai raban nembiak universiti ba Kota Samarahan enggau penyampau 100 iku.

Rambau pengawa bejadika gerija baru nya, urung 2,000 iku raban Kristian pelilih Kota Samarahan sama bisi datai meda hari besejarah nya.

LANTANG… Entara raban Kristian ke sampal datai ba pengawa bejadika begunan Gerija St Francis ke baru, kemari.

Suara Sarawak