Gerija St. Luke mantu sida ke angus rumah di Punggu Tapang

SIMANGGANG: Tiga pintu ruang bilik ti dituntung penusah angus rumah ba Punggu Tapang bedau lama tu tadi nerima bantu barang pemakai enggau mata duit ari Gerija St. Luke Sri Aman.

Bantu nya disuaka raban Gerija St. Luke ke betuaika Archdeacon Jackson Jarau ngagai sida ke tasah, apin lama ke udah.

Ku Jackson, penatai raban sida ngesah laban deka nanyaka berita sida ke dituntung penusah seraya meri jaku peransang ngagai sida.

“Tu endang udah nyadi tanggung pengawa raban gerija mantu ngelempungka penusah raban ke dituntung penusah lebih agi sid ke dipegai Gerija St.Luke,” ku iya.

Berebak enggau nya, Tuai Rumah Philip madah, naka tu sida ke dituntung penusah nya diau nyemilik kaban belayan seraya nganti nirika rumah baru.

Nya alai, Jackson ngarapka pengawa ngentak rumah baru nya ulih dirumbanka ungkup pengelantang sida ke tasah. Iya mega ngarapka sida ke tasah kering ati nempuh penguji nya.

Sama bisi datai ngabas penusah ba Punggu Tapang, Reverend Rodriguez Unak, Sarap Bada, Vincent Sawing enggau Boniface Manggie.

Suara Sarawak