Gerija St Luke Uma Belun udah tembu

MURUM: Penembu Gerija St. Luke di Uma Belor siti ari Program Transformasyen Menua Pesisir (RTP) Dun Murum ba taun 2018 udah tembu digaga lalu dipenyadi kena 2 Januari tu tadi.
Kaban Kunsil Nengeri (Adun) Murum Keneddy Chuk Pai Ugon nengah sebengkah penerang dibantai ba laman media rama iya, madah diri berasai gaga laban projek ngaga gerija tu udah bejalai enggau manah.
“Terima kasih ngagai semua piak ti mujur bejalaika pengawa baka piak Opis Kereja Raya (JKR) Bagi Menua Kapit enggau ke bukai laban udah mantu nyendiaka palan besembiang ungkup rayat di Uma Belor Leodian enggau BRS Sungai Asap.
“Pia mega, kitai beterima kasih ngagai semua piak ti meri kerejasama dalam ngatur program sehari tu (ensana) kelebih agi Rektor Paroki, Rev. Fr. Arokia Paul Raj, Paroki Church Of Holy Cross, Sg. Asap, Rev. Fr. Justin Dan, Rev. Fr. John Cyril, Chairman Besai Paroki Holy Cross, Sg. Asap Denis Jawa enggau bala bukai,” ku iya.
Keneddy bejaku munyi nya lebuh bejadika Gerija St. Luke di Uma Belor, ensana.

BEJADI Adun Murum Keneddy Chuk Pai Ugon (empat kanan) nyain plag tanda bejadika Gerija St. Luke Uma Belun ensana.

Ku iya, pengawa nya agi ulih diatur enggau mujur kelimpah nitihka atur pengawa standard (SOP) nagang pengerekai Covid-19.
Iya mega meri pengaga ati laban ulih begulai ba gerija baru kelebih agi begempuru enggau raban Roman Katolik di Uma Belor.
“Terima kasih ngagai Perintah Sarawak laban udah betatika pekara ti diguna rayat pupu bansa di menua tu,” ku iya.
Enda tinggal mega, Kennedy meri selamat taun baru 2021 ngagai semua kaban St. Luke Uma Belun enggau peranak ti diau ba genturung nya kelimpah ngelalau sida nitihka SOP nagang pengerekai Covid-19.
Sama bisi datai Sekretari Politik Kepala Menteri Micheal Mujah Lihan, Pemancha Tony Kulleh, Penghulu Saging Bit, Penghulu Katan Lawai, Penghulu Simon Ambit enggau bala bukai.

Suara Sarawak