Gidsa: Indu Dayak baru napat singkang pemansang dunya

SRI AMAN: Penumbuh Gerempung Indu Dayak Sri Aman (Gidsa) nyadi pelasar raban indu jeman baru ngepunka singkang nuju pemansang dunya kemaya hari.

Ku bini Menteri Kereja Raya Baru Bian, Yiu Ching Sieu, gerempung tu dikeandal ulih matak mayuh agi raban indu di menua tu ngambika sida ulih ngelangkar perambu begulai nengah gempung penemu lalu ngemujurka iya.

Yiu mega madahka diri lantang amat ati laban mayuh agi raban indu ulih meda enggau nemu pengelebih ngereja pengawa begulai nengah pelasar ke sama ari nengali pengawa kediri.

“Macham bansa pengawa ulih dikereja raban indu ungkup komuniti kitai, ruang bilik enggau diri empu, tang kita deka mujur agi enti gawa beraban, pengawa deka lempung lalu asil mega deka nambah.

“Ba pekara tu, aku andal amat Gidsa deka nyadi pelasar ti meruan sereta tegap ungkup bala kaban gerempung ti ukai semina ngaul diri ba pengawa rama aja tang mega ngiga jalai enggau chara baka ni raban indu ulih nyungkak ekonomi sida nengah dagang, pengawa rama baka bekebun, bumai enggau betanam betupi sereta kaul kerejasama rat entara sida,” ku Yiu andal.

Gidsa: Indu Dayak baru napat singkang pemansang dunya

Yiu mansutka jaku tu lebuh bejadika Pengerami Makai Lemai Mantar Gawai nyerumba Pengawa Ngelanchar Gidsa ditu apin lama ke udah.

Nangkan nya, Yiu mega muji penyikar enggau pengeransing bala kaban komiti Gidsa ngemujurka pengerami besai baka tu taja baru ditumbuh enggau dipadu mangku pengawa.

Bala kaban Gidsa nyengkaum Penyanding Penemu Norina Umoi, Chairman Bonie Langkop enggau Sekretari Yen Jebeni disaup bala kaban bukai ti datai ari serap menua Sri Aman bela sampal datai meri sukung ngemujurka atur pengerami malam nya.

Kelimpah ari nya, Baru Bian ke datai nyempulang bini iya mega udah ngagihka belanja penyampau RM10,000 dikena raban gerempung ngatur aktiviti sida.

Norina lebuh dirandau Suara Sarawak madahka diri temegah pengudah juluk ati iya nyadi nyata ti deka meda raban indu kelebih agi di Sri Aman mansang ba semua sukut pengawa.

BERANCHAU… Yiu Ching Sieu (lima kanan) disempulang Baru Bian (tiha kanan), Bonie (enam kanan), Norina (empat kanan), Yen (kanan) sereta bala bukai nganchau tikai kelai ngintu pengerami mantar gawai.

“Aku endang andal amat sida ke udah dipadu gawa ulih ngesan pangku pengawa ti dilempai lalu deka nyapai pemujur.

“Tu ukai pengawa ulih mujur tekala nya tang ari pengepuh enggau pengeliat ati sida ngereja pengawa, aku nemu sida deka teulihka pemujur. Tu peransang aku ngagai sida,” ku Norina madah nyemetak.

Seraya Chairman Gidsa Bonie Langkop mega mantaika diri lantang ati meda sukung ari semua kaban gerempung ti nadai belampung ati lebuh mutarka pengawa ngelama tu.

Ku Bonie, kaul kerejasama enggau pemereti ati nyadika kunchi pemujur sereta pengawa lanchar dikereja taja semua agi belajar chara gawa ti patut laban nya atur pengawa besai keterubah diatur sida sebuat.

“Ari saup bala kaban enggau semua ke bisi datai malam tu nyadika peransang diri, naka ulih gawa nangkup peminta, tuju enggau juluk gerempung tu ditumbuh.

“Nya kebuah besai amat pengarap aku kaul kerejasama tu meruan ditanggam pulaika pemaik begulai seraya ngemansangka ruang bilik Gidsa ti tau dikumbai kitai baka anak mit, baru nyingkang rebah tu,” ku Bonie ngandal.

Lebih 300 iku pengabang datai ngulu pengerami makai lemai ti keterubah diatur raban Gidsa ditu bela ngayanka sukung sida ke penumbuh gerempung indu baru ditu.

PERANSANG… Yiu Ching Sieu meransang raban Gidsa ngembing indu di Sri Aman nyapai pemujur enggau penyulut.

 

NIKIKA PENGABANG… Bonie enggau Norina ngambat penatai Yiu Ching Sieu disempulang bala bukai.