Giga inisiatif ti ulih nyungkak ekonomi rayat

KUCHING: Pemutus Perintah Besai deka beratika baru gaji minimum nya endang pengawa ti manah, ku Adun Batu Kitang, Lo Khere Chiang.

Taja pia ku iya, Perintah Besai patut ngiga siti inisiatif ti ulih nambahka penatai pemisi enggau ngangkatka tikas pengidup rayat.

Ku iya, Perintah Sarawak udah ngaga pemutus pemadu manah ngelempungka tating belanja rayat menua tu baka nyeruri rumah, ngurangka chukai pintu, meri diskaun bil api enggau ai sereta ke bukai.

“Agi betuaika Pehin Seri Adenan Satem suba, niang udah ngurangka chukai pintu dikena mantu rayat.

“Diatu, Kepala Menteri Datuk Patinggi Abang Johari Tun Openg udah ngemendarka agih belanja RM1 juta ngagai Adun dikena nyeruri rumah kediri tauka rumah panjai ba sitak sida empu,” ku iya.

Khere Chiang bejaku munyi nya ngagai pemberita pengudah ngabas Projek Nyeruri Rumah Rayat Miskin (PPRMS) ba Kampung Lidah Tanah ditu, kemari.

Suara Sarawak