KUCHING: Nembiak kolej Gloria Malong dipadu menggi gelar Kumang Gawai Gerempung Bansa Dayak Sarawak (SDNU) 2019, ditu malam kemari.

Peranak asal Sibu nya pulai ngemai perais mata duit RM3,000, selampai Kumang enggau segupung bungai ngalahka sepuluh pemekit renggat kepenudi.

Penuduk kedua dipenggi Claudia Michelle Sena Anak Billy Isang ari Betong, nembiak politeknik nerima perais mata duit M2,500, selampai Lulong enggau segupung bungai.

Indu dara bajik ari Sibu, Lovieana Jin @ Mili menggi gelar Selinggar Matahari nerima RM1,500, selampai enggau segupung bungai.

Seraya lapan pemekit bukai mega enda pulai jari puang pengudah sida bela nerima perais sagu ati RM300 siku.
Pekit Kumang Gawai SDNU tu diatur ba Christian Ecumenical Worship Centre (CEWC) ditu beserimbai enggau Pengerami Makai Lemai Gawai Dayak SDNU 2019, malam kemari.

TAMPAK PEGARI… Tiga dara bajik Gloria menggi gelar Kumang (tengah) diapit Claudia – Lulong (kiba) enggau Lovieana – Selinggar Matahari (kanan).

Ku Mandal Presiden SDNU ti mega Chairman Komiti Pengatur Pengerami Gawai Dayak SDNU Dr Johnnical Rayong Ngipa pekit Kumang tu sebengkah pengawa mantaika ngepan bansa Iban ngagai nembiak rebak baru.

“Pekit Kumang malam tu kena kitai mandangka penulin ngepan asal Iban nitihka menua ngagai nembiak rebak baru laban kitai bansa ngembuan gaya ngepan asal ti bebida.

“Baik menang tauka alah nya kira dudi tang pekara ti deka dibantai kitai ngagai mensia mayuh iya nya adat enggau pesaka asal dikembuan, ditampung kitai Iban,” ku iya.

Nangkan ke nya, Presiden SDNU Tan Sri William Mawan Ikom madahka hari besai Gawai Dayak ukai semina dikena mandangka ngepan Iban aja tang mega mantaika adat asal kitai bansa.

“Anang sesekali ngelaungka adat asal bansa kitai lalu anang nyadung berita, bejai pangan diri. Buai abis ulah kepapas enggau ati ke bingking.

“Setipak enggau rambai jaku pengerami kitai malam tu, Beserakup Besepenemu, ti ngemai semengat penyiru begulai ngagai pupu bansa, kelebih agi ngagai bansa kitai Iban,” ku iya.

Kelimpah ari pekit Kumang, bala pengabang malam nya mega diperindang ngena gendang pampat ari Taman Malihah, ajat enggau nebah sape sereta beperindang enggau bala penanyi ari Hallvard Band.

AMAT BAJIK… Bala pemekit kepenudi Kumang Gawai Dayak SDNU 2019 benung mandangka diri atas panggau.

Suara Sarawak