GPS enda gawa bemusin

SARIKEI: Inisiatif Perintah Gempung Parti Sarawak (GPS) bejalaika skim nyeleti rumah ungkup rayat seranta kelebih agi ba Dun Kuala Rajang ukai pengawa bemusin.

Menteri Muda Pemansang Mengeri enggau Pengeraja Asal Datuk Len Talif Salleh madah, batang tuju program tu dikena ngelempung tating penusah pengempu rumah.

Ku iya, projek baka tu mega deka seruran dipejalai bepelasarka sekeda atur udah ditetap kelimpah beratika peminta rayat.

“Ba sitak Kuala Rajang aja perintah udah ngagihka RM1 juta lalu naka diatu, nyauka manggai RM700 ribu udah dikena bejalaika projek tu.

“Taja agih belanja endang udah disedia tang pemendar nitihka pemutus Komiti Khas lalu komiti tu diketuai aku empu seraya bala kaban datai ari bala temenggong, penghulu enggau tuai rumah.

“Nya alai aku dekaka komuniti nyengkaum bala ketuai genturung pendiau enggau tuai rumah ngemaruka penerang rayat ba kandang menua sida nentuka bantu ulih diberi ngagai raban diselinting,” ku iya nerang ngagai Suara Sarawak pengudah ngatur pejalai ngabas ngagai Bukit Kinyau tadi.

UNGKUP PENGELANTANG… Pengari Palan Servis N.41 Kuala Rajang nyempulang Len Talig ngabas enggau meresa sekeda rumah ke deka diseleti, tadi.