GPS kediri, ukai masuk PN

KUCHING: Pengawa Bepilih Besai Nengeri (PRN) Sarawak ulih dilanjar nyema menua dikenukuka enda likun tang pemutus pekara nya semina ulih dibantaika Komiti Pengawa Bepilih Besai (SPR).

Kepala Menteri, Datuk Patinggi Abang Johari Tun Openg madah, nyema menua agi ulih jaga PRN deka dipejalai bepanggai ngagai pandemik Covid-19.

“Timpuh Dun Sarawak deka abis timpuh iya nya taun baru lalu kitai pan deka PRN diatur laban GPS deka ngulihka mandat baru ari rayat.

“Taja pia, sekalika nerus PRN Sarawak tauka enda taun nyin ila bepanggai ba pemutus penuh SPR,” ku iya.

Iya madah munyi nya rambau aum pemberita pengudah betuaika Aum Supreme Kaunsil Parti Pesaka Bumiputera Bersatu (PBB) ba Indu Opis PBB kemari.

Abang Johari ke mega Chairman Gempung Parti Sarawak (GPS) madah, dalam timpuh setaun tu, pengari rayat patut nyikap diri enggau manah nyentuk ngagai renggat baruh.

“PRN tu sempama siti pekit patut belatih penapat sebedua pekit lalu ukai ngereja nya maya nyau sempil.

“Nya alai, aku ngansak pengari rayat patut nyikap diri nyentuk ngagai renggat baruh,” ku iya.

Tandu iya, ungkup GPS pengawa ke ditegi endang seruran ngemeratka Sarawak.

Berebak enggau nya, iya sekali madah GPS kebendar bakih Perintah Perikatan Nasional (PN) ba renggat Perintah Besai.

“Tang, kitai nyadi sebuah parti ke ngembuan identiti bebida (kediri) lalu ukai masuk PN.

“Kitai mega chukup betuah laban Perintah PN ngambi Kaban Parlimen GPS dalam kabinet Perintah Besai,” ku iya.