GPS nadai kaul enggau tim Tun Mahathir tauka Anwar

KUCHING: Gempung Parti Sarawak (GPS) nadai kaul enggau pejalai politik Perintah Pakatan Harapan (PH), sekalika nyukung tim Menteri Besai Tun Mahathir Mohamad tauka tim Datuk Seri Anwar Ibrahim.

Tang, Kepala Menteri ti mega Chairman GPS Datuk Patinggi Abang Johari Tun Openg nyemetak madah, Perintah GPS semina bediri kediri megai Sarawak ngembuan politik ti tegap.

Abang Johari madah, pengelama PH megai menua Malaysia, menua ngasaika pejalai politik ti enda sebaka enggau pambar dataika sehari tu ketegal bisi dua tim iya nya Menteri Besai Ketujuh enggau Menteri Besai Kelapan, nyentukka GPS deka dibai sama ba pekara nya.

“Nya kebuah, kitai meseti berati kebuah Malaysia napi pekara nya nyentuk bisi kurang orang ti andalka menua nya.

“Kitai sama beratika polisi pelajar suah betukar atur ngena kasut chelum nyengkaum Pengawa Ngajar enggau Belajar (PdP) Subjek Sains enggau Matematik ngena Jaku English (PPSMI) lalu sama mega polisi ekonomi ti dipeda mayuh berutang, sida madah duit nya dikena mayar utang tang menua Malaysia majak nambah utang.

“Nya kebuah politik menua pambar, tu ukai jaku ajum tang tu mih pekara ti nyadi diatu. Nasip amat bisi Tasik China Selatan, ngambi kitai enda ngasaika pekara ti nyadi ba Semenanjung,” terang Abang Johari.

Iya mansutka jaku nya beserimbai enggau pengawa ngelancharka Program Sarawak Kita Empun ba indu opis Parti Pesaka Bumiputera Bersatu (PBB), Jalai Bako ditu, kemari.

Abang Johari ti mega Presiden Parti Pesaka Bumiputera Bersatu (PBB) madah, pengudah tiga taun ningkilka diri ari Barisan Nasional (BN), GPS mujur nunjukka sida ulih ngemansangka Sarawak 100 peratus lalu nadai nerima bantu ari Perintah Besai.

Suara Sarawak