BINTULU: Perintah Gempung Parti Sarawak (GPS) numbuhka mayuh insentif ungkup pengelantang rayat Sarawak kelimpah ulih mandangka pengulih diri semampai mantu rayat.

Menteri Muda di Opis Kepala Menteri (Undang-Undang enggau adat Penatai Asal), Datuk John Sikie Tayai madah, insentif enggau bantu ti diperambu tu ungkup semua komuniti Sarawak.

“Insentif enggau bantu tu ngaul anak baru ada nyentuk orang tuai. Pekara nya nyengkaum ‘Endowment Fund Sarawak’ ungkup anak baru ada, Insentif Indu Beranak ungkup raban indai ke baru udah beranak enggau Kenyalang Gold Card ungkup orang tuai,” ku iya.

Sikie madah munyi nya lebuh meri licha ba aum Bengkel Polis Komuniti Pelilih Selangau di Rumah Janting, Sungai Arip, Selangau, apin lama ke udah.

Kenu ku iya, Pemeri mayuh insentif enggau bantu tu sigi ungkup pemansang di nengeri tu ti ulih diasaika semua komuniti Sarawak.

Nangkannya, pemansang tu ukai aja ngaul infrastruktur tauka prasarana, tang pemansang mega ngaul pengelantang enggau pengelikun rayat Sarawak, ku tandu iya.

Sikie ti mega Kaban Kunsil Nengeri (Adun) Kakus madah tiap perambu pemansang perintah GPS deka meri pemaik ngagai rayat sereta meri perengkaguna ungkup semua komuniti menua tu.

Berebak enggau nya, Sikie mega madah orang tuai ti beumur 60 taun atas ulih minta Kenyalang Gold Card di Opis Pelilih Tatau enggau Opis Pengelantang Komuniti.

“Pemanah Kenyalang Gold Card tu ulih nyediaka insuran, diskaun servis pengerai, perengka pengangkut enggau barang pemun kelimpah bantu pemati penyampau RM3,000,” ku iya nyemetak.

Sikie mega mantaika geran projek mit luar nengeri (MRP) ti penyampau RM27,000 enggau RM5,000 ngagai Komiti Pemansang enggau Pengelikun Genturung Pendiau (JKKK) enggau Biro Orang Indu Rumah Janting.

Nangkannya, iya mega ngenataika setipikit baru dichiri enggau dichiri nampung baru pengawa ngagai 40 ketuai raban bansa di sitak Selangau di pegai Penghulu Lasit Bajieng.

Sama datai Pemesai Pelilih Selangau, Inting Nyamie enggau Penghulu Lasit Bajieng.