ARTIKEL

GPS sedia ngetan menalan

Facebook
Twitter
LinkedIn
WhatsApp
Telegram

KUCHING: Gempung Parti Sarawak (GPS) udah sedia napi Pengawa Bepilih Mit (PRK) Kunsil Nengeri (DUN) Jepak ti deka diatur kena 4 November 2023.

Chairman GPS, Datuk Patinggi Tan Sri Abang Johari Tun Openg madah, sida deka nganjung chalun ti dipilih lebuh hari ngantung nama chalun ti udah ditetap kena 21 Oktober tu.

Taja pia, Premier Sarawak nadai madah silik bekaul nama chalun ti deka bediri minta pilih ba sitak nya ila

. “Kitai deka nyikap diri, ba hari nganjung nama chalun, kami deka nganjung chalun meh…udah nya kita (rayat Jepak) deka ngundi baka selama,” ku iya.

Abang Johari bejaku munyi nya rambau aum pemberita pengudah bejadi Program Gempuru Antarabansa Keterubah Bioteknologi, Betanam Betupi Pintar enggau Dagang Pengelikun Pemakai (BioSFE 2023) di sebuah hotel ditu, kemari.

Iya dipinta ngelansa pekara tu pengudah aum media Komiti Besai Pengawa Bepilih (SPR) ti ngeletak 4 November nyadi haribulan ngundi PRK DUN Jepak lalu hari ngantung nama chalun ditetapka kena 21 Oktober lalu hari ngundi tumu kena 31 Oktober enggau haribulan writ kena 25 September.

Sebedau tu, rambau Program Nasih Tanah Loji Gas Tebing Tasik Rosmari-Marjoram Tanjung Kidurong, Abang Johari madah deka nganjung chalun ari Parti Pesaka Bumiputera Bersatu (PBB) ba dia.

PRK DUN Jepak diatur bekau ari pemidang penyandang niang Datuk Talib Zulpilip ketegal sakit kena 15 September tu tadi.

Talib, 72, midang kena pukul 5.50 lemai 15 September 2023 di Palan Perubat Pakar Normah Kuching.

Niang ti mega penyandang DUN Jepak mangku pengawa nya kenyau ari enam penggal lebuh sitak nya dibantai ba pengawa bepilih nengeri dalam taun 1996.

Rambau Pengawa Bepilih Besai Nengeri Ke-12 (PRN-12) ba taun 2021, niang Talib mujur ngetanka Jepak enggau 4,243 undi bepadan empat penjuru.

Ba taun 2009, niang dichiri nyadi Menteri Muda Dagang Temuai enggau Pesaka Asal Sarawak sereta kala mangku pengawa nyadi Menteri ba Opis Kepala Menteri (Integriti enggau Ombudsman) Sarawak.

LAIN-LAIN BERITA

BERITA TERBARU