Guavo di Gua Niah majak kurang

MIRI: Guavo iya nya tai semawa digulai enggau tai burung ba Gua Niah agi nyadi pemansut penatai pemisi sekeda raban bansa Penan ari Kampung Tanjung Belipat.

Taja pia ku Warden Sarawak Forestry Corporation (SFC) ba Taman Negara Niah, Shirley Naning, apin mayuh sida bejalaika aktiviti baka tu.

Kenu ku iya, aktiviti ngumpul Guavo di Gua Niah udah dipejalai peranak dia kenyau taun 80-an nyadi sum utai tumbuh.

“Guano ti digumpul mega deka dijual ngagai pedagang lalu semina dua tiga iku aja sida ke agi ngumpul Guavo tu,” ku iya nerang ditu, kemari.

Shirley madahka Opis Muzium kala mansutka gerah ngambi peranak dia enda ngumpul Guavo laban irauka pengawa nya ulih ngeruga keresa lama sereta arkeologi ba dalam Gua Niah.

MAYUH GUNA… Guavo tauka tai semawa nyadi sum tau ngasuh utai tanam galak.

“Taja pan agi ngumpul Guavo tang enda mayuh baka seguni tauka dua guni enggau enda digumpul ninting hari ambis suah dua kali seminggu aja,” ku Shirley.

Nambahka nya ku iya, Guavo udah kurang enda baka selama dipelaba ketegal semawa majak kurang ba Gua Niah.

Shirley ngarapka mayuh agi pemansik datai kitu bejalaika pansik ba Taman Negara Niah.

“Kami endang ngelaluka penatai pemansik datai kitu tang sida meseti bejalaika pansik nitihka pematut ngambi enda ngeruga utai lama ditu.

“Mayuh utai lama ulih dipansik ba Taman Negara Niha kelebih agi utai tumbuh enggau utai idup laban kitai endang begunaka mayuh pemansang pemadu baru sekalika bansa ke bisi ditu tauka agi idup, berapa pemayuh enggau pekara bukai,” ku Shirley nerang silik.

NERANG… Shirley nerangka pasal tai semawa enggau sarang walit ba Aum Besai Arkeologi Entarabansa. Gambar – NADIM BOKHARI

Suara Sarawak