Guna awak PKP belajar kediri ba rumah

BETONG: Peresa dikinsil enggau dilanjar ukai reti bala anak patut kemisi panjai sereta ngelengka bup.

Adun Layar, Gerald Rentap Jabu, madah, nembiak patut pintar ngena awak ke bisi ngatur jam belajar kediri empu.

Ku iya, pemutus digaga Menteri Pelajar, Dr. Mohd Radzi Md Jidin pengudah berundingka pekara pengelikun enggau pengerai bala nembiak.

“Taja UPSR enggau PT3 dikinsil lalu SPM/SVM enggau STPM/STAM dilanjar, tang aku ngarap bala anak anang ngumbai diri kemisi. Titihka chara belajar ti udah diajar enggau ditetap.

“Kitai diasuh diau jenuh ba rumah sekumbang timpuh Atur Tagang Pejalai (PKP), nya alai kena manah awak tu belajar kediri empu ba rumah.

“Kena manah teknologi pemadu baru laban kitai enggai meda sekula kemisi, bala anak mega kemisi,” ku iya madah ngagai Suara Sarawak tadi.

Rentap madah, apai indai mega patut nentuka bala anak sida seruran nandu pelajar enggau nembuka kereja sekula ti diberi pengajar.

Tu mih maya pemadu engkeman endur apai indai ngajar bala anak ba pekara disiplin enggau ngasika jam belajar di rumah, meretika utai diajar lalu nerenak ulah angkunka pengawa belajar.

Suara Sarawak