Guna geran ke pemaik komuniti

KUCHING : Menteri Muda ba Opis Kepala Menteri (Undang-Undang Adat Bumiputera) Datuk John Sikie Tayai andal geran ti diberi perintah ulih ngemujurka program ke udah dilanggur raban Gerempung Ukai Dikuasa Perintah (NGO) ba menua tu.

Ku iya, tuju pemeri nengah geran iya nya dikena mutar penanggul suntuk belanja lebuh bejalaika tanggungpengawa nyadi NGO.

“Aku nemu mayuh gerempung NGO begunaka geran baka tu ari perintah.

“Perintah mega endang enggau naka ulih seruran berundingka chara engkeman mantu gerempung taja agih belanja dikena bisi enda chukup.

“Besai pengarap nengah bantu tu gerempung NGO ulih chakah agi ngatur program ke pemaik komuniti,” ku iya nengah sebengkah penerang ensana.

Dulu ari nya, iya bisi nyuaka geran ngagai tujuh bengkah gerempung NGO ba opis iya ditu ensana.

Nangkan nya Sikie ngelalau raban NGO anang kelalu malut diri enggau pengawa politik lebuh bejalaika pengawa.

“Gerempung NGO patut nemu tanggungpengawa ti dilempai ba sida iya nya mantu perintah meri penerang ti betul nuju rayat ba tikas baruh.

“Pengawa meri penerang nuju mensia mayuh bekaul enggau polisi perintah endang patut dikereja sida (NGO) lebih agi diatu nyau semak pengawa bepilih.

“Utai tu patut dikereja sida ngambika rayat nemu sereta meretika genap pekara tauka polisi ti dipejalaika perintah.

“Pia mega ba awak ti sama pengelikun, pengelantang pendiau mensia mayuh enda patut dikemerat,”ku iya.

Berebak enggau nya, Chairman Gerempung Pekara Veteran Soldadu Kor Renjer (PVTKR) Leftenan Kolonel (B) Mohd Melintang Abdullah madah, pemeri geran nya besai bendar reti laban ulih dikena ngatur mayuh agi program bantu ungkup veteran soldadu ke idup tusah.

“Terima kasih ngagai Datuk John Sikie Tayai laban udah ngangihka belanja ngagai PVTKR baka ke sehari tu (ensana).

“Agih belanja tu deka dikena kami sebuat enggau manah mantu bala veteran kitai ke balat begunaka bantu,” ku iya.