Guna MRP nitih peminta, ukai nguntungka diri empu

BINTULU: Raban penerima Geran Projek Mit Menua Pesisir (MRP) ditangkan patut nguna manah geran tu awakka meri pemaik ngagai Gerempung Ukai Dikuasa Perintah (NGO) lalau ukai dikena nguntungka diri empu aja.

Menteri Ba Opis Kepala Menteri Integriti Enggau Ombudsman Datuk Talib Zulpilip madah, tuju geran nya diberi endang baka ke udah dipinta dalam pom peminta sida.

“Geran MRP ke udah diterima nya enda ulih diguna ungkup tuju bukai tang mesti dikena nitihka pekara ke udah dipinta dalam pom peminta,” ku iya.
Talib ke mega Adun Jepak madah munyi nya maya pengawa nyuaka Geran Projek Mit Menua Pesisir (MRP) Dun Jepak ba palan servis PBB Dun Jepak ensana.

Kenu ku iya, tuju perintah meri agih MRP nya endang dikena ngelengkaska atur pemansang ba kandang menua pesisir kelimpah dikena ngedut takah pemansang entara kandang mengeri enggau menua pesisir.

Urung 31 pengari NGO nyengkaum kelab ba sitak Kunsil Nengeri (Dun) Jepak bisi nerima geran MRP sepenyampau RM227,500. -Ukas

Suara Sarawak