BINTULU: Penerima geran Projek Mit Pemansang Menua Pesisir (MRP) dipinta ngena agih belanja ti diterima enggau manah lalu ukai disalah guna ungkup diri empu.
Menteri Betanam Betupi Moden enggau Pemansang Wilayah Sarawak, Datuk Seri Dr Stephen Rundi Utom madah, geran ti dikemendar Perintah Sarawak nya mesti dikena ungkup komuniti lalu enda tau dikena ungkup tuju sengapa kelimpah nitih ari ti dipinta.
“Nya kebuah, penerima mesti nentuka projek nya dipejalai enggau manah nyengkaum meri ripot pejalai projek ngagai Opis Adun nyadika opis menteri,” ku iya.
Rundi mansutka jaku nya ba Pengawa Nyuaka geran MRP Dun Kemena, kemari.
Ku Adun Kemena nya, agih belanja MRP nya chukup beguna dikena ngerumban buah pemansang ba menua pesisir di menua tu.
Ba pengawa nya, Rundi udah nyuaka geran MRP penyampau RM200,660 ngagai 20 penerima ngarika Komiti Pemansang enggau Pengelikun Genturung Pendiau (JKKK), Raban Nembiak enggau Gerempung Indu ba rumah panjai, kelab enggau gerempung ukai dikuasa perintah (NGO) Dun Kemena.
