Guna senapang ungkup pekara ke patut aja

KUCHING: Barang sapa ke udah bisi lisin senapang di Sarawak dilalau ngambika semina nguna senapang nya ungkup pekara ke patut aja lalu ukai dikena ngasu jelu ke dijaga.

Sapit Kepala Menteri Tan Sri James Jemut Masing madahka sida ke ngembuan senapang nya patut ngibun senapang sida enggau manah.

Ku iya, tu kelebih agi senapang endang diempu ari peturun tuai kelia sereta enda ngena lisin senapang nya ngagai pekara ke salah.

“Anang ngasu jelu ke nyau deka punas kelebih agi jelu ke dijaga ba babas di Sarawak.

“Kena senapang kita ngagai pekara ke beguna lalu enti senapang nya endang senapang peturun, jaga senapang nya enggau manah,” ku iya.

Masing madah munyi nya lebuh dirandau pemberita pengudah pengawa ngabang ngagai rumah Presiden Serakup Besai Gerempung China Bagi Menua Kuching, Samarahan enggau Serian Datuk Richard Wee, Hari Minggu tu tadi.

Nangkan nya, iya meri terima kasih ngagai raban polis laban mereti sereta enda narit lisin senapang peranak asal Sarawak.

“Aku meri terima kasih ngagai raban polis ke enda narit lisin senapang peranak asal Sarawak ke endang udah lama bisi lisin tu sereta meretika pekara tu,” ku iya lebuh nyaut tanya ari pemberita bekaul enggau penerang dipansutka Ketuai Polis Sarawak Datuk Ramli Din kenaka Hari Lima tu tadi.

Ba penerang nya, Ramli madahka Ketuai Polis Menua Tan Sri Abdul Hamid Bador bisi madahka sida semina deka narit lisin rifle ke suah dikena sida ke ngasu enggau nadai pemendar lalu lisin nya deka ditarit nitihka renggat.

Masing ti mega nyadi Presiden Parti Rakyat Sarawak (PRS) ngemeratka pekara nya laban pengawa bekenaka senapang siti ari pengawa lama sereta chara lama peranak Sarawak begiga ke pemakai ba belah kampung tauka babas ari jeman kelia.

Suara Sarawak