HSL berbuka puasa bersama pengamal media di Sarawak.

Gunung Ngeli di Simunjan bisi ngundan sejarah

Indun Silong
RUAI
21 Ogos 2022
2:34 pm

SIMUNJAN: Simunjan ngembuan mayuh palan ti ulih nyadi palan dagang temuai laban sekeda palan tu bisi ngundan sejarah pesaka lama.

Menteri Dagang Temuai, Seni enggau Main Asal (Motac) Datuk Sri Nancy Shukri madahka sebuah palan ti dikumbai Gunung Ngeli bisi penau nyadi palan eko-dagang temuai laban ngembuan sejarah ngali arang batu enggau pansik sainstifik utai tumbuh ari Sir Alfred Russel Wallace.

“Sir Alfred Russel Wallace siku pemansik dalam bidang zoologi udah ngaga bup dikumbai ‘The Malay Archipelago’ (1869).

“Kelimpah ari nya, ngagai orang ti rinduka pengawa niki gunung sida mega ulih niki Gunung Ngeli lalu meda rampa menua Simunjan, Batang Sadong enggau Batang Lupar,” ku iya.

Nancy bejaku munyi nya ba Program Bejadika Esplanade Simunjan di Esplanade Simunjan ditu, kemari.

Ku iya, ba Gunung Ngeli mega bisi taba pesaka ti ditinggalka ruang bilik Brook iya nya palan ngali arang batu jeman Perang Dunya Ke-2 kelia.

“Simunjan mega bisi palan endur ngelantang ati baka wong Sungai Rian enggau Wong Muas di Kampung Kepayang enggau ai wong di Kampung Temiang.

“Peranak di rumah panjai bansa Iban ba kandang menua tu landik ngasilka barang kraf baka nganyam bakul,” ku iya.

Dulu ari nya, lebuh mantaika jaku pemuka, Adun Simunjan Alwa Dris andalka kerejasama semua piak beguna dalam negapka pemansang di Simunjan.

Ku iya, sekeda opis perintah ti ba Pelilih Menua Simunjan baka Opis Kampung, Opis Betanam Betupi, Opis Rela enggau Opis Pengerai udah enda kondusif enggau enda likun dikena agi.

“Pia mega, opis perintah baka Opis Pengerejister Bansa, Opis Pengintu Pengelantang Pendiau enggau Opis Kemas numpang ba Opis Pelilih Menua Simunjan ti lama.

“Nya ngujungka sekeda pengereja pengawa ti gawa ba palan nya nyuwa ba luar laban sida napi pemar nadai palan endur diau.

“Aku minta raban ari Opis Kereja Raya (JKR) berunding enggau perintah nengeri ngambika ulih ngaga begunan perintah ti baru mutarka pekara tu,” ku iya.

Iya nangkan nya nambah, taba perambu endur ngaga begunan baru udah dikelala iya nya ba genturung Mengeri Baru Simunjan.