BAU: Hari Kebangsaan diintu semua rayat Malaysia ninting taun dikena mandangka pengangkun enggau penaluk ke menua.

Ku Imelda, siku pengajar ba Tabika Kemas Kampung Sagah, pengerami tu mai reti chukup besai ngagai kitai laban ulih diau lantang enggau likun, nadai irauka pekara ti tau ngeruga pengelikun menua lalu ngasuh charut ngujungka menua siga.

Nya alai ku iya, beguna amat semengat talukka menua diterenak ari umur biak baka renggat pra sekula nentuka rebak baru meretika pemesai guna enggau reti pengelikun enggau pengelantang.

“Entara tuju bukai dikena ngenang jasa bala bujang berani ti udah berambun nyawa ngelaban munsuh sereta enda tinggal sida ti udah lesi bebadi nyawa ngetanka menua ari raban penyelawai.

“Nangkup peminta enggau juluk tu ke alai tabika kami ngatur pengerami ngintu Hari Kebangsaan Ke-62 begulai enggau bala nembiak mit enggau apai indai ditu,” ku iya nerang lebuh dirandau Suara Sarawak.

Hari Kebangsaan diintu kelai semua kitai talukka menua Malaysia enggau keran nerenak ulah bebasa enggau nemu reti kitai ngintu pengerami tu ngagai bala nembiak mit tu, ku iya.

Ku Imelda, kitai endang patut ngintu pengerami tu ngambika seruran ingatka menua Malaysia udah nyingkang ke mua nitihka singkang menua maju ke bukai, mansang dalam pengelikun enggau pengelantang kenyau ari 62 taun ke udah.

“Berasai temegah enggau beterima kasih laban kitai diatu ulih idup lantang enggau likun sereta ulih begulai bebaik ngintu pengerami enggau nadai ati nangi,” ku iya.

Ngelansa pasal pengerami nya, sepenyampau 21 nembiak mit disempulang apai indai sida.

Macham rintai program diatur ngerichahka pengerami sehari nyentuk ti ngaul bala pengajar, staf tadika, apai indai sereta bala nembiak mit besekula dia.

Pengerami dipungkal enggau sampi minta berekat ditangkan enggau lagu Negaraku, Ibu Pertiwiku enggau Tabika Kita.

“Udah nya jaku pesan ari pengari komiti pengatur, pemerindang lagu patriotik, Sayangi Malaysiaku, Suara Malaysia, Saya Anak Malaysia enggau Aku Negaraku.

“Tu mega nyengkaum pekit mantaika pengelandik enggau penau bala nembiak mit baka Pekit Mandangka Pekayan Beragam Anak Mit enggau Pekit Ngelinsu, seraya batang pengerami dipenyadi enggau pengawa nyirap kek,” ku Imelda ngelansa.

Batang tuju pekit tu diatur ngambika bala anak mit talukka menua, nerenak semengat patriotik enggau berasai temegah ngena pekayan digaga ari tambai Malaysia.

Berebak enggau nya, pengawa nyuaka perais ngagai bala nembiak mit ti nyulut ba pekit ke diatur kelimpah sida dirami ba pengawa makai serumpu enggau begambar bebala mayuh ungkup kenang.

Nya alai ku Imelda, hari kebangsaan tu patut diintu ninting taun ngambi kitai seruran ingatka jasa bujang berani seraya berasai temegah diau ba menua ti lantang enggau likun.

Sama datai pengajar Elizabeth, pemantu pengajar Mena enggau Audrey, bala apai indai, nembiak mit sereta bala bukai.