Hari keterubah SPM lanchar

KUCHING: Sepenyampau 35,312 iku chalun Sijil Pelajaran Malaysia (SPM) 2020 di Sarawak napi peresa nya berengkah sehari tu nyentuk 25 March tu.

Direktor Pelajar Sarawak, Dr. Norisah Suhaili madahka nembiak SPM nya ngaul 33,064 iku chalun Sekula Sekondari (SMK), 942 iku chalun Sekula Sekondari Peribit, 361 iku chalun sekula di baruh ejensi bukai kelimpah ari Opis Menteri Pelajar Malaysia (KPM) enggau 945 iku chalun ngatika diri.

“Aku ngarapka chalun terus nitihka Atur Pengawa Standard (SOP) penuh maya dalam bilik peresa.

“Semua chalun mesti fokus enggau belajar laban SPM nya besai reti sereta nyaga pengerai enggau ulah ngambi semua sida likun.

“Hari keterubah peresa mega lanchar baka dikearapka kitai,” ku iya lebuh dirandau, ditu tadi.

Terang Dr. Norisah, bisi 294 palan peresa di selampur Sarawak ke alai 226 iku penyelia enggau 2,566 iku pengawas peresa.

Suara Sarawak