Hari Malaysia dirami ba Stadium Perpaduan

KUCHING: Pengerami Hari Malaysia deka diatur ba Stadium Perpaduan, Petra Jaya ditu kena 16 September, berengkah ari pukul 7 lemai.

Sapit Kepala Menteri Datuk Amar Awang Tengah Ali Hasan madahka endur ngatur pengerami ditukar berindik ari gaya hari besebun ti disadang nyadi nyentuk ujung bulan tu.

“Pengudah nerima jaku lalau ari Opis Pengemata Gaya Hari, Opis Kunsil Pengeraja Asal enggau Rampa Menua (NREB) enggau Opis Rampa Menua (DOE), komiti pengatur sepenemu nukar endur pengerami tu.

“Pemutus tu mega berundingka pengerai mensia mayuh enggau bala penyereta ti deka datai ngulu pengerami tu laban kitai enda ulih ngadang baka ni gaya hari maya hari pengerami nyadi,” ku iya madah nyemetak.

Awang Tengah madah munyi nya ba aum pemberita di padang bilun Hornbill Skyways ditu tadi.