Hari Pengerindu : Peluang nyintal kaul enggau diri sebilik

KUCHING: Ninting taun kena 14 Februari di seraya dunya deka ngingatka haribulan tu dikumbai Hari Pengerindu lalu pengerindu nya mega endang patut terus diterenak enda ngira maya ngagai semua orang.

Suara Sarawak bisi nanya penemu mensia mayuh bekaul enggau Hari Pengerindu.

Julia Peter

“Hari pengerindu ba aku ngingatka kitai ngambi seruran nunjukka pengasih enggau penyiru ke pangan diri lebih agi ba diri melaki bini. Pia mega, hari pengerindu mantaika penyayau kitai ke diri sebilik ngagai bala anak enggau indai apai.”

Dinas Sureng @ Dom Dennis

“Hari pengerindu tu kebendar dikena ngingatka diri empu awakka seruran ngembuan ati ti liat sereta nelap. Kitai patut bebasa ke pangan diri lebih agi ba diri melaki bini, anak enggau apai indai sereta menyadi. Kitai mega mesti ngembuan ati siru ngagai ruang bilik ngambika ruang bilik kitai menyana baka orang bukai.”

Vornica Amy Peter

“Hari pengerindu tu manah peluang endur kitai nyintal kaul ke lebih rat ba diri sebilik baka makai begempuru. Pia mega, hari tu ulih diintu ngambika penyayau enggau pangan diri enda mudah luya. Ngarapka pengerindu kitai begulai enggau pangan diri tan nyentuk ke pengujung nyawa.”

Sima Tawil

Selamat Hari Pengerindu nuju semua peminat aku. Enti ulih ninting hari meh mantaika pengerindu enggau pangan diri kelebih agi nuju orang ti disayau kitai. Besampi ngarap ke pengerindu kitai meruan nyentukka seribu taun agi seagi seput di dunya.

Madeline Dugat

Ba genap iku orang Hari Pengerindu tu mai reti ke bebida. Tu beduduk ari pemisi pengerindu ba ati sida enggau baka ni sida deka mantaika pengerindu nya ngagai orang ke disayau. Aku meri Selamat Hari Pengerami lebih agi ngagai bala menyadi ke disayau. Sukung sereta peransang ari bala menyadi meruan dikeingat aku belama.

 

Suara Sarawak