Sehari tu iya nya 28 september udah ditetapka nyadi Hari Rabies Sedunya lalu kitai bela ngingatka pemati siku orang landik pasal kimia enggau mikrobiologi ari Peranchis, Louis Pasteur ke udah bebendar ngaga vaksin rabies keterubah ungkup Gerempung Pengerai Dunya (WHO) 2018.
Penyakit rabies baka ke endang ditemu kitai ukai semina ulih ngerampit jelu aja, tang mega ulih ngerampit mensia enti sema kena ketup ukui ke udah dirampit penyakit tu.
Rabies tauka dikumbai penyakit Ukui Gila sebansa penyakit ke ngachau urat tubuh pengudah kena rampit igi penyakit rabies.
Nangkan ke nya, penyakit tu ulih nabanka nyawa orang ke dirampit nyema enda dianjung berubat enggau lengkas.
Chara penyakit rabies tu berampit iya nya pengudah kena ketup, keramak, tau kena ai lur ari jelu ke mai igi penyakit rabies lalu chara iya ngerampit mensia kelimpah dibai ukui iya nya kera, mayau, munsang enggau ribit.
Pia mega, penyakit tu ulih berampit ba mensia ari pengawa mindah kereban dalam tubuh.
KELAI KENA RABIES
Kelimpah ari nya, kelai ke suah dipeda nyadi bekau kena rampit penyakit tu iya nya tebantai dalam kandang 30-90 hari pengudah sida kena ketu jelu.
Taja pia pengawa bejalaika pansik ba orang ti kena ketup jelu tu bisi mar mimit laban tebal agi sida nyau enda ingatka haribulan diri kena ketup jelu tauka kena keramak jelu nya.
Entara kelai tumu bekau kena rampit baka tabin, geremai ba abi kena ketup tauka sebening pala.
Kelimpah ari nya, bisi sekeda kelai bukai diasai orang ti kena rampit rabies tu baka besintak urat, sendat seput enggau udu tegenung kediri. Tu entara kelai ke udah raya.
Nya alai, nyema udah kena ketup jelu ke bekaul, kitai mesti lengkas nganjung diri beperesa tauka berubat ke sepital.
Chara tumu merubat diri pengudah kena ketup jelu tu iya nya tuchi abi ketup sampai beresi. Udah nya, nganjung diri ke klinik tauka sepital besemak awakka abis nya diperubat enggau diberi vaksin rabies.
Tuju vaksin tu diberi dikena nguatka tubuh ngelaban penyakit rabies, sebedau penyakit nya majak raya tauka ngerusak urat ngagai untak.
Taja pia, nyema igi penyakit nya udah ditemu udah ngerampit salur untak. Pengawa berubat silik mesti dipejalaika tekala nya.
RABIES DI SARAWAK
Nya alai, nitihka penerang ari Opis Pengerai Malaysia penyakit rabies kebendar agi bisi nyadi ba Sarawak.
Naka 13 Mac 2021, bisi 33 kes rabies dikenuku nyadi ngujungka ari penyampau nya 31 kes bebadi nyawa ba Sarawak.
Bepelasarka penerang ari ex-menteri pengerai, Datuk Seri S. Subramaniam pada tahun 2017, asal penyadi penyakit rabies di Sarawak dipelabaka bepun kena bai ari menua Kalimantan Barat, Indonesia beduduk ari rikod kes ke chukup mayuh nyadi ba menua nya.
Kes keterubah bebadi nyawa ketegal penyakit rabies ba Sarawak diripotka kena 4 Julai 2017 ngaul dua iku nembiak ba Bagi Menua Serian, iya nya sikunembiak indu beumur enam taun enggau menyadi iya ke beumur empat taun.
Nangkan ke nya, siku agi nembiak bebadi nyawa beumur tujuh kena 13 Julai 2021 sereta siku agi beumur lima taun bela bebadi nyawa empat hari udah nya ketegal rabies ke mega sama asal ari Serian.
Nya alai, mensia mayuh patut ngadang lalu meretika penyadi penyakit tu lebih agi ungkup jelu tupi baka ukui enggau mayau.
Jelu ke ditupi patut dianjung betuchuk vaksin nagang rabies awakka penyakit nya enda ngerampit mensia.
Vaksin nagang rabies nya udah diaku 100 peratus ngasi dikena nyeliahka rabies ari ngerampit mensia.
Diatu pengawa meri vaksin nagang rabies terus dipejalaika ninting taun ba menua tu ungkup jelu ke ditupi dikena nyamin pengelikun mensia mayuh.
Taja pia, komuniti mesti bela meri kerejasama ngagai raban bekaul. Nyema jelu tupi sida bisi mandangka kelai kena rampit rabies anang betangguh madahka ngagai raban bekaul awakka ngerekai penyakit ukui gila nya ulih dipuntan.
