HDC patut chakah mutar parit sumbat

KUCHING: Kaunsil Pemansang Rumah (HDC) patut chakah agi bejalaika tanggungpengawa mutarka penanggul parit sebat di rumah flat Taman Sri Cahaya Tondong.

Sapit Menteri Dagang Dalam Menua enggau Pekara Bebelika Barang (KPDNHEP) Chong Chieng Jen madah peminta tu beduduk ari dua iti kes denggi udah nuntung peranak genturung rumah nya apin lama.

“Minta piak HDC mutarka penanggul parit sumbat ti ditapi sida ti diau ba kandang flat tu.

“Bisi dua iti kes denggi udah nyadi ba genturung pendiau tu (Taman Sri Cahaya Tondong) apin lama empas ari penanggul nya,” ku iya.

Chieng Jen bejaku munyi nya lebuh ditanya pemberita ba Program Beripai Rukun Tetangga Taman Sri Cahaya Tondong ditu, kemari.

NGINTU PEMERESI…Chong Chieng Jen (empat kanan) begulai enggau mensia mayuh beripai muai uras ti betekat dalam parit.

Tambah iya, HDC mega patut meratika peminta bukai sida ti diau ba rumah flat nya baka peminta nambah palan ngengkah kerita enggau balai endur ngatur program.

“Peminta nambah palan ngengkah kerita enggau balai endur ngatur program udah lama digaga sida tang lalu nadai timbal.

“Tu nyengkaum sida napi penanggul ngena tangki septik ti udah pechah urung dua taun ti lalu,” ku iya.

Ku iya, taja peranak genturung dia bisi ngatur pengawa beripai tang HDC patut mantu sida meresi parit sereta perengkaguna bukai awakka sida ti diau dia ngembuan pengidup lantang sereta bepengerai.

Nangkan nya, Chairman Rukun Tetangga Taman Sri Cahaya Tondong Chai Jun Chen madah peminta meresi parit, nambah palan ngengkah kerita enggau balai kala dipinta sida sebedau tu, tang lalu nadai timbal.

“Lebuh bisi kes denggi nyadi ba genturung pendiau ditu baru sida bisi ngabas sereta bejalaika pengawa ngasap nyamuk.

“Aku ngarapka piak ti bekaul mutarka penanggul ti ditapi kami ditu lalu anang bechiping ati mantu,” ku iya.

Jun Chen madah rumah flat Taman Sri Cahaya Tondong bisi 11 buah blok ti diwan 660 buah pintu.

Rumah flat nya bepun diwan sida kenyau taun 2002 lalu diatu penyampau mensia mayuh ti diau dia urung 2,000 iku.