Helena siruka keresa lama

KUCHING: Helena David Kalum ngarapka produk pinggai enggau manik seramik digaga iya ulih rembus ngagai makit entarabansa dudi hari dikena ngangkatka pesaka lama Iban tu.

Lebuh dirandau, peranak asal Ulu Layar, Betong tu ngarapka diri bulih bantu ari perintah baka nyendiaka mesin dikena iya nunu produk seramik nya.

Iya madahka diri minat ngaga manik seramik pengudah ngulu sebengkah kus belajarka pengawa ngaga manik enggau chara ti engkeman.

“Pengawa ngaga manik seramik tu mega sebagi ari chara nambahka penatai pemisi lalu mandangka pemanah sereta penyelai produk manik Sarawak.

“Aku belajarka pengawa ngaga manik seramik tu ba Institut Standard enggau Pansik Industri Malaysia (Sirim).

“Sirim nyendiaka bemacham kus enggau latih ungkup bala pedagang ke deka nambahka penemu ba dunya dagang bekaul,” ku iya dikena ngepunka randau nya.

Helena madah, Sirim mega meri peluang ngagai kami ngena kereban dikemisi ba inkubator Opis Menteri Dagang Entarabansa enggau Industri ke dipatau Sirim.

“Ari nya, aku ngena peluang tu nambahka penemu diri laban endang rinduka pengawa ngaga produk ari seramik tu baka manik enggau pinggai.

“Sirim tu mega udah mayuh ngembing aku enggau pedagang bukai nambahka penemu diri nentuka genap iku kami nempa produk ti bekualiti.

“Leka manik ke udah tembu tu mega dijual aku ungkup bala penguna ke landik nusuk manik nyadi dagang sida tang mih pinggai aja ke apin dijual aku.

“Aku berengkah nyual leka manik nya ngagai bala penguna kenyau ari taun 2015.

“Terubah bedagang, aku ngena puku diri empu tang kereban dikena ngaga leka manik enggau pinggai nya dibeli aku mimit-mimit.

“Leka manik tu entara produk pemadu laku dijual aku tang naka diatu, aku semina nyual produk tu nyentuk Semenanjung aja.

“Tebal agi, bala penguna meli leka manik tu chara borong laban sida tepantup ati sereta rinduka produk keranjai jari aku,” ku Helena madah baru.

Kelimpah ari leka manik, Helena mega bisi nyual pendant, terabai, pasu enggau love gift nitihka peminta bala penguna.

DITEMPA… Tanah ladu ke digulung enggau ditempa nyadi leka manik.

PESAKA KITAI

Pengempu chap dagang Helena Craft Borneo madah, iya teulihka runding ngaga pinggai tu beduduk ari iya rindu meda pemanah pinggai lama.

Tambah mega ku iya, diatu mayuh pinggai ukir lama Iban ke nyelai enggau antik nya nadai agi.

Helena mega madah, iya keran deka ngaga pinggai ukir Iban tu laban nadai orang ngaga tauka ngerembaika pengelandik ngaga pinggai ukir lama Iban tu.

Iya mega madahka pengawa tu sebagi ari chara ngetan sereta ngangkatka pengelandik lama kitai Iban ngambi enda lesap diserunyut arus pemansang moden.

Ku Helena, iya berengkah nguji ngaga pinggai lama pengudah nyau lama udah landik ngaga leka manik.

Ku iya, kebendar chara tauka rurun ngaga manik enggau pinggai lama nya nyau deka sebaka.

Tang ku Helena, pengawa ngaga pinggai tu kitai mesti bisi penemu nentuka pinggai nya tan sereta enda mudah pechah.

“Kitai mega mesti bagas ngiga penemu enggau pansik bekaul ukir pinggai lama sereta guna iya.

“Ba aku, ukir enggau chura pinggai nya bepanggai ba pengelandik enggau kreativiti nya empu ke ulih narit ati mensia mayuh.

“Kitai mega mesti puh sereta beratika genap pengawa nya enggau manah laban pengawa ngaga pinggai lama nya begunaka timpuh lama dibanding ngaga leka manik.

LANDIK BEDAGANG… Helena entara pedagang ti landik nempa produk ari tanah ladu.

“Kadang sehari manah aku ngukir siti pinggai nitihka ukir enggau pemesai pinggai nya.

“Nyau berundingka ukir, udah nya belubah ngukir ba pinggai nangika bisi salah ukir ke tau pulaika pengerugi laban enda manding dipeda.

“Chukup lama mih aku ngaga siti pinggai nya laban keran deka nempa pinggai ti bekualiti sereta narit ati mensia mayuh.

“Enda ngawa lubah asal mih pinggai digaga aku tu manah, tan enggau bekualiti,” terang Helena pasal pengepuh ngaga pinggai lama nya.

Helena madah, genap pinggai kitai Iban kelia endang bisi nama enggau guna iya empu.

Tang iya diatu agi ba renggat ngaga pansik enggau nengkebang ukir sebedau ngaga nama ungkup genap pinggai digaga nya.

Naka diatu, Helena apin nyual pinggai tu laban agi ngaduka penama, ngaduka pengawa nungkus pinggai nya laban pinggai ke ditempa nya mesti bisi nilai seni enggau ukir lama.

Nangkan nya, iya madahka pengawa nyual pinggai lama ti ditempa ngena tanah ladu enggau chat tauka glaze nya mesti bejalaika pansik ke silik agi dulu.

Helena madahka rurun ngaga pinggai lama tu nyau deka sebaka enggau pengawa ngaga leka manik baka terubah nempa tanah ladu nyadi siti pinggai.

Udah nya, dijembi dataika rangkai sebedau ditunu ba mesin pengangat 800 darjah Celsius pengelama 12 jam sebedau diukir. Tembu ukir lalu ditunu baru enggau pengangat 1,080 darjah Celsius pengelama 24 jam tauka sehari.

“Lebih 100 iku orang nganjung peminta madahka diri deka meli pinggai tu berengkah ari aku ngaga pinggai bulan March tu tadi.

“Tang mih aku bedau deka nyual pinggai nya laban deka ngaduka tungkus iya dulu lalu chukup gaga asai ati laban orang minat deka meli.

“Naka ke ditemu aku, apin bisi bala pedagang bukai ngaduka pengawa ngaga pinggai baka aku lalu aku mih terubah ngaga pinggai lama ke mega keresa lama kitai Iban.

“Timpuh pinggai nya tembu digaga bepanggai ba ukir, kadang sehari nya endang timpuh aku ngaga ukir aja.

“Nyema ukir nya pedis digaga, lama agi ga aku ngaga lebih ari sehari tang nyema muntang kadang sehari aja.

“Dikena nambahka penemu diri, aku suah ngulu eksibisyen enggau program bejualka manik baka program diatur Kraftangan Sarawak, sarawak Craft Council, Sirim tauka Mintred enggau ke bukai.

“Program baka tu beguna amat dikena nambahka penemu diri kelebih agi ba jeman moden ti bekenaka teknologi digital ngambi kitai enda tinggal nerima penemu pemadu baru.

“Aku mega bisi ngambi nembiak ari Universiti Malaysia Sarawak (Unimas) ninting taun ba pengawa latih inkubator ninting taun lalu taun tu sida deka berengkah belatih bulan Julai tu.

“Ukai semina nya aja, aku mega kala dichiri ngatur bengkel ngaga keresa indu digaga ari manik baka sumpin, gelang enggau marik diatur begulai enggau Kaunsil Pelilih Betong (MDB),” ku Helena nusuika peneleba diri.

NGANGKATKA KERESA LAMA… Helena keran ngangkatka keresa lama kitai Iban ngambi dikelala dunya.

MESTI PUH NGEREJA

Lebuh nerang pasal rurun ngaga manik seramik tu, Helena madah terubah iya deka ngulung enggau nempa tanah ladu nitihka tukuh dikedeka kitai.

Tembu nya tadi, iya deka nyembi manik nya dataika udah rangkai lalu ditunu ngena mesin khas dikumbai kiln enggau pengangat 800 darjah Celsius pengelama 24 jam.

Kiln tu sebansa mesin ke pemadu angat baka oven dikena nunu seramik ngambi produk seramik nya teguh sereta enda mudah retai.

Udah nya, Helena deka ngelinsu manik nya nitihka ukir dikedeka lalu ditunu baru enggau pengangat 1,080 darjah Celsius pengelama 48 jam.

Iya madah, pengawa ngaga manik seramik tu endang chukup lama, kira dua hari mih nentuka manik nya manah sereta teguh.

Nya kebuah ku iya, kitai mesti puh enggau liat ati ngereja pengawa tu enti deka meda asil ke manah sereta ngemantupka ati bala penguna.

“Tang mih mesin khas tu chukup beguna ngambi pengawa kitai lempung agi laban enti nadai mesin tu nyangka lama amat nganti leka manik nya rangkai enggau manah.

“Aku ngaga manik seramik nya bepanggai ngagai ukir enggau chura ke deka digaga, enti ukir nya muntang jampat agi ga tembu.

“Baka pedagang bukai, pengawa dikereja aku tu endang bisi pemar iya empu baka kereban dikena ngaga manik tu mar rega.

“Taja pia, bai ati rinduka pengawa tu, aku sanggup bebelika kereban dikena ngaga manik seramik nya tang naka diatu, mesin kiln nya aja mih apin ulih dibeli aku.

“Pia mega, endur nunu produk seramik ke dikumbai firing nya mega mimit aja lalu enti deka ngena palan nya mesti netapka hari bulan dulu enggau Sirim.

“Udah mesan baru ulih nunu produk seramik nya laban mayuh pedagang bukai bela bekunsika mesin nya.

“Entara kereban diguna aku lebuh ngaga leka manik tu baka glaze, chat enggau tanah ladu,” ku Helena nerang.

UBAH RUNDING

Jaku peransang ngagai bala nembiak ku Helena, sida mesti bagas sereta minat bemain enggau tanah.

Kelimpah ari nya ku iya, bala nembiak mesti ngubah runding sentang tanah nya ulih nyadi duit sereta ngenataika penatai pemisi enti sema sida bisi minat ba pengawa nya.

Ba lansa sama, Helena mega meri besai terima kasih ngagai sida sebilik enggau bala bakih ke semampai nyukung pejalai iya ba dunya dagang tu.

“Kami sebilik mih nyadika tiang sukung aku, lebuh aku labuh, putus pengarap enggau puntan ba sebengkah pengawa, sida mih nyadika pengering ngambi aku angkat lalu liat ati ngereja pengawa nya.

“Terima kasih mega nuju Tuan Roslan Razali ari Alianza Group laban mayuh udah nyaup ba pengawa nyendiaka chap dagang enggau tungkus.

“Iya mega suah ngajar aku sentang pengawa, ngelakuka produk nengah online baka media rama, chara ngena sales funnels enggau pelasar e-dagang.

“Bantu ari Tuan Roslan nya besai reti ba aku laban diatu semua pengawa endang bekenaka media rama baka Facebook laban dia ulih narit ati bala penguna bekunsika produk sereta lebih ngelala chap dagang aku.

“Nyadi, diatu aku benung ngaduka pelasar e-dagang kelimpah bala penguna ulih meli produk aku chara borong.

“Sida ke bisi ati nambahka penatai pemisi mega ulih nyadi dropship enggau agent produk aku kelimpah,” ku Helena nyimpul randau.

Barang sapa ke deka meda produk dijual Helena, kita tau ngelawa laman Facebook iya, Helena David Kalum enggau Facebook Pages Helena Craft Borneo.

Bala penguna mega tau ngelawa laman Instagram iya, helenadavidkalum tauka Whatsapp nuju lumur 0138141151 nyema bisi tanya bukai.

Suara Sarawak