ARTIKEL

HILARY HARISSON SANDIN

Hilary Harisson siku penganta profesional

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

PENGELANDIK nganta dikembuan siku penganta artis profesional (MUA), Hilary Harisson Sandin, 31, mujur matahka penemu mensia mayuh ti ngait pengawa nya enggau raban indu aja.

Endang amat laban pengawa nganta nya bekaul enggau pemajik gamal lalu nya tebal agi dipejalaika raban indu.

Siti rambai jaku ti madahka ‘pemajik enggau indu sigi enda ulih diserara’ lalu nya mandangka pemesai reti ‘bajik’ ba raban indu.

Penemu sekeda orang ti madahka raban lelaki enda patut ngaul pengawa nganta sereta ngumbai lelaki ti ngaul pengawa nya siku lelaki ‘lemi’.

Taja pia, Hilary mujur mandang ngagai mensia mayuh asil keranjai jari penganta lelaki setipak enggau keranjai jari penganta indu sereta ngembuan penyelai kediri empu.

DIKERINDU RABAN LELAKI
Taja pia, berebak enggau ubah dunya kemaya hari tu sereta segang pemansang, pengawa ti dikuasa raban indu nya majak dikerinduka raban lelaki.

Raban lelaki ti suah dikait enggau gaya sigat, berani sereta kering diatu majak diterima ba pengawa bekaul pemajik gamal.

Nya alai, raban indu ti ngaul pengawa nya bela nerima semekih ti besai ari raban lelaki lalu asil keranjai jari sida enda tau dipeda ngena sepiak mata aja.

Asil keranjai jari sida ukai semina setipak tang bisi sekeda profesional, menyana, bekualiti enggau kreatif agi enti dibanding enggau asil keranjai jari bala penganta indu.

Nya alai, pemintar sida mantaika buah runding ti kreatif enggau inovatif mujur ngasilka seni ti nyelai sereta menyana lalu nya enda ulih dibantah agi.

Berebak enggau nya, semua penguna ti kala ngena servis nganta Hilary endang tepantup ati enggau pemanah kualiti keranjai jari iya nyentuk sida nyadi penguna tetap iya.

Ukai naka nya aja, tebal agi sida muji penyelai asil keranjai iya ti bebida ari asil keranjai orang bukai sereta ngembuan penyelai kediri empu.

Entara servis nganta disediaka penganta profesional nya baka servis nganta makai lemai, pengantin, pengawa merekat ba gerija, kumang enggau ti bukai.

Mensia mayuh ti deka nemu silik bekaul servis nganta ti disedia Hilary diperansang nitih Facebook Hilary Harisson, Instagram @hilaryharisson enggau TikTok @hilaryharisson.

PANSUT ARI KARUNG
Enti ulat entadu enda pansut ari karung, baka ni iya ulih nyadi kesulai ti nyelai sereta manah dipeda?’.

Penemu nya dipansutka penganta profesional nya dikena iya ngelalau genap orang ngambi berani mantaika penau tauka pengelandik dikembuan sida.

Iya madah, genap orang bisi ngembuan penau kediri empu ba sekeda pekara lalu penau nya patut dibantai enggau dikemansang meruan.

“Anang nyimpan penau nya kediri tang nya patut dibantai enggau dikemansang dikena meri pemaik ngagai diri empu enggau orang bukai.

“Nengah penau tu meh kitai ulih mansang ke mua nyapai penyulut nunda singkang orang bukai ti udah dulu maju kelimpah ulih nyungkak penatai pemisi.

“Pia mega, nengah penau tu kitai ulih meri pemaik ngagai orang bukai ngelingi kitai.

“Ambi ke chunto, aku bisi penau nganta lalu nengah penau tu meh aku mai empas ti manah ngagai orang bukai ke pemaik begulai.

“Kebuah pia laban nya meh tuju kitai idup dikena meri pemaik enggau empas ti manah ngagai pangan diri,” terang iya.

Nangkan nya, iya madah, lebuh kitai besemekih enggau pangan diri, besemekih meh ngena chara ti patut lalu aram meh kitai begempung mai chura ti manah ngagai dunya pemajik gamal kelebih agi ba Malaysia ditu.

“Pengawa nganta tu majak nerima timbal manah ari semua orang enda ngira serap umur, penempa enggau bansa sereta majak diterima komuniti,” tampung iya.

MODEL BISIKAN CINTA
Empai lama, Hilary diberi pengandal ati nyadi model begulai ba video muzik (MV) lagu Bisikan Cinta ti disadaka penanyi ti mega Mrs Global Asian 2023, Kimi Tomas.

Berebak ari nya lalu ditambahka penyigat dikembuan bujang asal Bintulu nya ngujung ke iya majak dikelala enggau narit ati mensia mayuh.

Pengelebih Hilary ba pengawa nganta, peneleba belakun sereta ngembuan pantang Iban mujur narit ati pengeluar lagu nya ngambi iya nyadi model ba MV nya.

Gempung semua nya endang nemban enggau watak lelaki Iban ti digiga pengeluar lagu nya dikena ngasilka MV ti bekualiti.

NYADI PUN INSPIRASYEN
Pengerindu besai Hilary ba pekara bekaul pemajik gamal mujur ngerandang peluang ngagai iya mekuh pengawa nya nyadi siti pengawa nyambil.

Taja pen kiruh enggau pangku pengawa diri nyadi siku orang ti pengawa perintah tang nya enda nekul iya neruska minat diri ba pengawa nganta.

Hilary ukai semina pintar magi awak diri lalu bejalaika pengawa nganta nya muak ke ujung minggu tauka lebuh maya kemisi tang iya mega pintar ngerebut peluang.

Media sosial nyadi siti pelasar beguna dikena iya ngelakuka servis nganta enggau asil keranjai hari diri ngambi majak dikelala mensia mayuh ba selampur Sarawak kelebih agi ba bagi menua Bintulu enggau Sibu.

Iya mega ngarapka diri ulih nyadi chunto enggau inspirasyen ngagai orang bukai ngambi pintar magi awak sida entara bejalaika pangku pengawa enggau nerus minat.

Tambah mega, ku iya, gaya ekonomi ti enda tentu kemaya hari tu balat mangka pengidup genap orang.

“Nya alai, beguna bendar kitai ngiga enggau nyungkak penatai pemisi tambah lalu siti ari nya nengah pengawa ngemansangka penau dikembuan diri,” ku Hilary.

NYIMPAN JULUK BESAI
Penganta profesional nya masang juluk besai deka ngerembaika penau nganta dikembuan iya ngagai tikas ti besai agi dudi hari.

“Aku ngarapka diri ukai semina dikelala ba selampur Sarawak aja tang bela dikelala ba tikas dunya.

“Bekerejasama enggau bala MUA ti tebangkar nama ba industri nganta ari serata dunya endang siti ari juluk aku.

“Aku enggai ngetu naka tu aja tang deka ransing agi nyapai penyulut besai ba pengawa tu ngambi servis aku ulih diasaika semua orang,” terang iya.

Hilary meransang mayuh agi raban lelaki ngaul diri ba bemacham pengawa baka pengawa nganta, pisin enggau ti bukai.

Sebedau ngujung ke randau, Hilary ngelaluka mensia mayuh meda lakun nyelai iya enggau Kimi Tomas dalam MV Bisikan Cinta versyen jaku Melayu ti dipandang ba pelasar YouTube Kaban Music Production (KMP).

Ungkup penerang, sekeda ari palan ngaga MV lagu nya endang ba menua Jipun rambau musin chelap.

BEPENAU… Hilary ukai semina landik nganta tang bisi penau nyadi model ba MV Bisikan Cinta.
NYULUT… Hilary kala ngantaka Mrs Global Asian 2023, Kimi (kiba) enggau _All Nation Ambassador, Miss & Mrs Plus World Malaysia 2024, Noreeny Manggie (kanan). – GAMBAR ZUL SIBU PHOTOGRAPHER
BAJIK MENYANA… Sekeda asil keranjai jari Hilary ti chukup menyana.
BAJIK MENYANA… Sekeda asil keranjai jari Hilary ti chukup menyana.
BAJIK MENYANA… Sekeda asil keranjai jari Hilary ti chukup menyana.

BERITA LAIN

Mayuh bantu ngubah pengidup rayat

DEBAK: Bemacham bansa bantu diberi perintah dikena ngubah enggau nyaga pengelantang rayat. Sapit Premier Sarawak, Datuk Amar Douglas Uggah Embas madah, nya nentuka rayat bulih

Gaji niki nipakka inflasyen

KUCHING: Perintah Besai dipinta nyemela pengawa nikika gaji nipakka tikas inflasyen ngambi pekara tu enda meri empas ngagai rega barang niki ti ngasuh atur nikika

BERITA TERBARU