Hope Place Kuching nganjung bantu ngagai terabai komuniti ke bejejaga ba palan PKPD

KUCHING: Gerempung Pengintu Pendiau Harapan Kuching (Hope Place Kuching) meri bantu ngagai raban terabai komuniti ke disadang mudah kena rampit penyakit sekumbang napi pandemik Covid-19.

Bantu nya disuaka Pemungkal Hope Place Kuching lalu disadung ngagai raban terabai komuniti ke gawa nyaga dua genturung pendiau ke diasuh nitihka Atur Mindah Betagang Dipekul (PKPD) di Kampung Kolong 2 enggau Kampung Sinar Budi.

Ku Kelvin Wan, entara bantu ke diberi ngagai sida ke gawa ba palan PKPD tu iya nya ai irup, mi dalam kung, ruti, kopi piket, milo, sengkabung mua enggau penuchi jari.

“Pemeri tu kelai terima kasih ke pengawa raban terabai komuniti ke udah bebendar nyaga pengelikun ba endur nya.

“Kelimpah nya, aku meri terima kasih ngagai Gerempung Anak Bulan Mirah Kuching laban udah meri penuchi jari,” ku iya nengah penerang media, kemari.

Naka tu, Hope Place Kuching udah mantu lebih 190 ruang bilik ke tasah.

Berebak enggau nya, mensia mayuh seruran diperansang besaup meri bantu barang pemakai ngagai raban orang tusah.

Penerang silik pasal bantu ari Hope Place ulih betelefon terus nuju lumur 082-505987 enggau ba jam opis dibuka ninting Hari Satu ngagai Hari Lima.

Suara Sarawak