KUCHING: Gerempung Pengelantang Pendiau Pengadang Kuching (Hope Place) mantu empat pintu peranak Kampung Simuti Puncak Borneo, Padawan ti dituntung penusah angus ensana.
Pemungkal Hope Place Kelvin Wan madahka enggau enda betangguh sida begaut mantu peranak kampung ti dituntung penusah nya taja maya nya ukai hari gawa tauka hari besai.
“Ari Kuching ngagai Kampung Simuti urung 70 kilometer lalu ngambi sejam setengah pejalai.
“Kami mantu barang pemakai baka berau, minyak makai, garam, gula, mi, milo, kuie, telu, sadin enggau pemakai pagi hari” ku iya.
Kelvin madah munyi nya ba sebuah penerang kemari.
Ku iya, kelimpah barang pemakai sida mega mantu barang bukai baka kain mandi, pua, ubat ngeli, sabun enggau panggal.
“Semua barang tu diserah ngagai siku ari pengari sida ti tasah iya nya Nyewan Siyug.
“Nitihka penerang ari Nyewan, Opis Pengintu Pengelantang Mensia Mayuh (JKM) mega bisi datai mantu sida dulu agi ari nya.
“Iya mega nusi, api nyerarai kena 11 Oktober nyin kemari maya pukul 10.30 malam tang nadai nyawa bebadi,” ku iya.
Sapa deka betanya silik agi pasal pengawa Hope Place tauka deka meri bantu ngagai orang bukai ti beguna tau betelefon ba lumur 082- 505 987 tauka meri bantu nengah bank (Persatuan Kebajikan Harapan Kuching Maybank 5112-8900-1160).
