KUCHING: Beserimbai enggau pengerami Taun Baru China (TBC) ke deka diintu enda lami agi dia raban gerempung ukai perintah (NGO) Hope Place bisi datai ngabas enggau bekunsi pengaga ati enggau raban orang lunggar umur.

Entara ke bisi nerima bantu TBC tu iya nya Jong Hing Kah,  65, enggau menyadi iya ke beumur 58 taun bela ditepan penyakit timpang runding.

Kenu ku Hope Place nengah sebengkah penerang, seduai nya diatu diau begulai lalu nadai orang ngibun enggau mantu.

“Siku agi orang lunggar umur ke dibantu iya nya Tan Siew Moi, 63 bujang enggau nadai orang enggau sebilik.

“Tan mega enda bepengerai ditepan penyakit polio ngujungka iya tusah deka mindah enggau enda berapa meda.

“Kelimpah ari nya, Hope Place mega bisi ngabas siku agi orang lunggar umur, Chin Chun Fah, 64 bisi penanggul pedis patung enggau ngena kerusi ruda.

“Chin kala diau enggau anak iya tang udah nya anak iya midang taun siti nyin kemari ngujungka Chin nadai orang ngibun,” ku penerang nya.

Nya alai, Hope Place meri terima kasih ngagai semua orang ke udah meri bantu ungkup raban orang lunggar umur nya nyengkaum bantu datai ari Bintulu.

“Taja diau jauh, tang sida udah nganjung bantu ketegal pengasih enggau penyiru ke orang lunggar umur ba Kuching.

“ Entara barang bantu TBC ke diberi iya nya limau mandarin, pemakai rangkai, tusu tepung Omega 3 enggau Ang Pau (anak belanja).

“Udah nya, raban Hope Place mega bisi nerima bemacham pemeri TBC ari mensia mayuh di Kuching,” ku iya.

Barang bantu nya disadung ngagai raban B40, nyengkaum raban indai tauka apai tunggal, enggau ruang bilik ke bisi diri sebilik ditepan penyakit raya.