KUCHING: Hotel Riverside Majestic (RMH) diatu udah dibuka baru ngagai mensia mayuh pengudah pengawa nyeruri hotel nya nyau deka tembu.
Chairman Kaunsil Pemansang Ekonomi Sarawak (SEDC) Tan Sri Datuk Amar Dr Abdul Aziz Husain madahka pengawa nyeruri hotel naka udah ba renggat kepenudi diatu udah tembu.
“Ngena rambai ‘Royal Majestic’, ruang besai enggau bilik temuai diseruri manah agi nguna langkar nitihka buah runding ari menua Indonesia seraya nguna gaya rampa menua asal ari tebing sungai ti likun sereta ‘mewah’.
“Sebedau tu RMH semina betikas hotel empat bintang tang udah pengawa nyeruri tu tembu hotel tu deka berubah nyadi hotel lima bintang,” ku iya.
Abdul Aziz bejaku munyi nya ba aum media pasal pengawa muka baru hotel nya ditu, kemari.
Ku iya, RMH ngembuan 241 buah bilik tang sekeda ari bilik nya agi ba proses diseruri ti dipelabaka deka tembu penuh bulan Disember tu ila.
Iya nandu, RMH diatu bisi bilik baum (The Sarawak Chamber) ti ulih nangkup 900 ngagai 1,400 iku temuai.
“Kami mega bisi tujuh buah bilik ulih endur ngatur program iya nya Wind Suite 1, Wind Suite 2, WindSuite1&2, Deer Suite (Bilik VIP), Lady Suite, Boardroom 1 enggau Boardroom 2.
“Berengkah 4 Julai, semua bilik ngatur program enggau bilik baum dibuka ungkup diambu bagi program perintah, korporat enggau peribit nyengkaum pengerami khas baka orang melah pinang,” ku iya.
Iya mega madahka, beserimbai enggau pengawa muka hotel tu, SEDC deka ngatur pengerami makai lemai ngintu Hari Pengada SEDC Ke-50 ba Sarawak Chamber RMH ti deka dipenyadika Premier Sarawak Datuk Patinggi Tan Sri Abang Johari Tun Openg.
Sama bisi datai Menijar Besai SEDC Abdul Hadi Abdul Kadir, Sapit Menijar Besai SEDC Rokayah Hamdan enggau bala bukai.
