KUCHING: Mayuh bengkah subsidi disediaka Perintah GPS tu nunjukka Perintah Sarawak endang ibuh sereta meri perati lebuh mantu ngelempungka nasit bala rayat.
Bantu ngagai nembiak mega bisi disediaka nengah Inisiatif Nembiak Kemisi Sarawak (i-GPS) ngagai anak Sarawak ke benung nyambung pelajar di Semenanjung, Sabah enggau Wilayah Persekutuan Labuan ngambi pulai ke Sarawak maya musin pengerami
Nambahka nya, Kepala Ketua Menteri Datuk Patinggi Abang Johari Tun Openg madahka berita manah deka neruska pengawa meri i-GPS RM300 penyampau dua kali tu disikap meri reti ke besai rambau mansutka jaku maya Pengawa Bebuka Puasa Begulai enggau Anak Sarawak di Palan Konvensyen Kuala Lumpur, Hari Lima apin lama ke udah.
Mayuh bala nembiak enggau apai indai madah Perintah GPS endang ibuhka nasit rayat kelebih agi bala nembiak ba nengeri tu.
Nembiak Universiti Kebangsaan Malaysia (UKM), Muhammad Luqman Hakim Sulaiman, 21, madah pengawa meri subsidi tu endang meri reti ke besai laban bisi sekeda nembiak enda ulih pulai kemisi nyerumba hari pengerami enggau diri sebilik ketegal penanggul belanja.
“Rega tikit bilun ke mar kelebih agi maya musin pengerami ngujungka bisi sekeda nembiak enda ulih meli tikit bilun.
“Terima kasih ngagai Kepala Menteri laban udah mantaika bantu subsidi tu. Subsidi tu ukai semina meri pengaga ngagai kami bala nembiak tang mega ngagai kami sebilik laban sama ulih nyambut Hari Raya ba menua ,” ku iya ke asal ari Kota Samarahan.
Cynthia Emmelda Jerry, 21, nembiak undang-undang UKM ari Kuching, pengawa meri subsidi tu ulih ngelempungka penanggul kelimpah meri pengelantang ngagai apai indai enggau bala nembiak.
“Puji Tuhan. Bantu tu ulih ngelempungka penanggul bala apai indai aku lebuh meli tikit dikena maya kemisi nyambut Gawai enda lama agi.
“Terima kasih ngagai Perintah Sarawak laban meri perati enggau suah ninga serebana anak Sarawak ke benung ngiga pemandai ba menua orang. Terima kasih sekali agi,” ku iya madahka pengaga ati.
Seraya, David Bakit, 21, nembiak kus injinir undang-undang UKM ari Sarawak, meda pengawa meri insentif tu ulih mantu pengelantang nembiak ke benung ngiga pemandai ba menua orang.
“Nyadi anak Sarawak ke belajar ba Semenanjung, aku chukup gaga laban sida udah meri perati ngagai anak Sarawak ti bejalai ngagai menua orang ngulihka pemujur lalu nyadi orang ke mujur ngambi ulih ngemajuka Bumi Kenyalang.
“Kami ngarapka ulih pulai mai pemujur ke besai enggau gawa ba menua diri lebuh tembu belajar ila dikena ngenang jasa perintah,” ku iya.
Ba penemu siku indai ke ngembuan anak benung nyambung pelajar ba Universiti Teknologi Mara (UiTM) Shah Alam, Maria Semon, 61, pengawa meri insentif tu endang mantu dalam ekonomi ke diatu.
“Subsidi tu deka ngelempungka penanggul dalam belanja apai indai ngambika meda bala anak sida pulai ke menua rambau musin pengerami tu,” ku iya.
Nangkanka nya, bisi sekeda nembiak ari ruang bilik kurang penatai pemisi ngiga pengawa puang setengah masa ngiga belanja kediri dikena meli tikit bilun pulai ke menua rambau pengerami tu.
“Nya alai, pengawa meri subisidi i-GPS ti diatur tu endang pekara ke patut ngambi ngelempungka penanggul bala anak ke benung ngiga pemandai ba menua orang,” ku iya madah.
Kelimpah, siku indai ke ngembuan anak belajar ba Universiti Putra Malaysia, Aminah Sepawi, 58, meri pengaga ati ngagai Perintah Sarawak laban udah meri subsidi nya.
Ku iya, pengawa meri subsidi RM300 penyampau dua kali tu endang pekara ke patut ba Sarawak laban bala anak ngembuan apai indai ke bebida raban bansa.
“Subsidi tu ulih mantu nembiak ngerami dua pengerami enggau apai indai sereta sida sebilik,” ku iya nerang.
