I-Keep terus dipejalai

INFO
I-KeeP tu entara inisiatif ti diatur perintah enggau ejensi peribit nyual barang guna ninting hari ba rega ti patut.

KUCHING: Inisiatif Kedai Ekonomi Penguna tauka I-KeeP deka terus dipejalai lalu dikearap ulih ngelempungka tating pengidup rayat.

Sapit Menteri Dagang Dalam Menua Enggau Pekara Bebelika Barang (KPDNHEP) Chong Chieng Jen madahka I-KeeP tu entara inisiatif ti diatur perintah enggau ejensi peribit nyual barang guna ninting hari ba rega ti patut.

“Beserimbai enggau Karnival Beli Barangan Malaysia, I-KeeP dilancharka enggau Supermarket Everwin dikena nyual barang guna ninting hari enggau rega ti patut.

“Ari tinjau aku meda mayuh mensia meli barang nengah inisiatif tu ba Everwin,” ku iya.

Chieng Jen bejaku munyi nya ba aum pemberita pengudah nutup Karnival Beli Barangan Malaysia (KBBM) sereta Ngintu Hari Penjaja enggau Peniaga Mit (HPPK) Renggat Zon Sarawak ti diatur kena 18 Oktober nyentuk 20 Oktober di Padang MJC Batu Kawa ditu, ensana.

Ku iya, opis menteri sida endang ngelaluka nyema bisi agi kedai enggau supermarket bukai deka nyereta I-KeeP tu.

“Ba Semenanjung mayuh udah kedai nyereta I-KeeP tu baka KK enggau e-Mart.

“Nama-nama kedai tauka supermarket ti deka enggau ngambi bagi nyereta I-KeeP tu endang dikelaluka, laban aku ngarap mayuh agi barang guna ninting hari ulih dijual enggau rega ti patut,” ku iya.

Bekaul enggau kimpin KBBM dia iya madahka gaga laban kimpin tu nerima sambut ti manah ari mensia mayuh.

“Tu ti keterubah kitai ngatur ba Kuching sereta ngintu HPPK sekali.

“Ngarapka kimpin tu tau meransang mensia mayuh rindu meli barang Malaysia sereta ulih nambahka penatai ekonomi menua kitai,” ku iya.

Iya mega ngarapka ba taun ti deka datai sida mujur agi ngatur karnival ti sebaka.

“Keterubah ba taun tu kitai ngatur ba Kuching, engka ba taun ti deka datai kitai milih palan bukai di Sarawak.

“Kimpin tu amat beguna ngagai bala mayuh kelimpah meri penyedar, enggau nya aku meri terima kasih ngagai opis menteri serta bala komiti ti udah bebendar ngatur pengawa,” ku iya.

Suara Sarawak