Ibun manah apai indai kitai

HARI Indai semampai diintu ninting taun lalu taun tu hari indai diintu kena 10 Mei 2020 tu kelai ngenang budi enggau pemanah semua indai ba serata dunya.

Indai tu entara orang pemadu besai reti ba pengidup kitai lalu sama mega enggau apai.

Pemujur kitai ba dunya tu endang bepun ari apai indai enggau chara seduai nyeridi kitai ngambi nyadi mensia ti beguna dudi hari.

Pia mega, indai udah berambun nyawa ngadaka kitai ba dunya tu enggau nupi kitai dataika udah besai.

Apai indai mega enggau naka ulih ngiga belanja ngambika semua anak ulih idup menyana enggau meli utai dikedeka sida kelimpah nyengulaka bala anak datai ba tikas ke tinggi ba pekara pelajar.

BESAI JASA…. NK Yongai begambar kenang enggau indai iya.

Kelimpah ari meri pengasih enggau penyayau ngagai bala anak, indai mega ngembuan tanggungpengawa ngajar, nyeridi enggau ngelalau bala anak sentang utai ke tau dikereja tauka enda tau dikereja sida.

Enti bala indai suah nyeridi anak sida sentang utai ke patut dikereja, udah tentu bala anak deka nyadi orang ti nemu tanggungpengawa diri sereta ulih berunding nitihka pematut enti udah besai ila.

Lebuh udah besai ila, bala anak enda tau enda ngenang pemanah indai enggau apai laban penyiru kitai nya endang diguna lebuh sida udah tuai jemah.

Jasa indai nyangka enda ulih dibalas enggau duit ringgit tang ulih dibalas kitai enggau chara nempa pemujur sereta ngibun sida ari diatu nyentuk udah tuai ila.

Siku penanyi Iban benama NK Yongai madah, indai tu mih penerang ba pengidup tiap mensia lebuh nyingkang ba dunya tu.

PENGERING KAMI… Raban Masterpiece meri selamat hari indai ngagai semua indai ba menua tu.

Nambahka nya iya, penyada lagu Indai tu mega madahka budi indai enda tebalas datai pengujung dunya laban pemesai budi sida ngadaka kitai ba dunya tu.

“Lagu Indai disadaka tu endang meri besai reti sereta kelai ngenang pemanah semua indai ba dunya tu kelebih agi indai aku empu.

“Selamat Hari Indai nuju semua indai ba dunya tu,” ku NK Yongai.

Raban Masterpiece mega ngena awak tu meri Selamat Hari Indai lalu ngarapka sida meruan gerai enggau lantang senang.

“Meri Selamat Hari Indai nuju semua indai kelebih agi bala indai kami empu ti udah berambunka nyawa bepun ari sida ngandung enggau ngadaka kami ba dunya tu.

“Nadai pengering enggau pementas ulih ngelaban penyiru sereta penyayau bala indai ba dunya tu lebih ari kita,” ku raban Masterpiece.

“Terima kasih laban udah ngibun, nyaga enggau ngemata kami ari mit nyentuk kami ulih ngidupka diri empu baka ke diatu.

Pia mega ku iya, pesan Hari Indai tu mega dituju ngagai bala bini kami ti dikesayau.

“Terima kasih laban semampai ngintu enggau ngemata bala anak enda ngira siang enggau malam.
“Sida nya mih nyadika pengering alai kami bepanggai ngereja semua pengawa,” ku iya.

Nangkan nya, Juliana Sambai mega meri Selamat Hari Indai ngagai indai iya empu enggau semua indai ba menua tu.

“Indai tu mih nyadika pengering enggau pun pemujur ba pengidup aku enggau kami semenyadi.

“Pia mega, indai semampai nyaga enggau nyeridi kitai nyadi mensia ti menyana ari mit nyentuk besai.

“Ngarapka indai aku meruan gerai belama enggau aku sayau ke nuan indai,” ku Juliana.

Nya alai, ukai semina seharitu aja endur kitai ngenang sereta ngintu Hari Indai tang ninting hari endang hari sida kelai budi sida ba pengidup kitai.

Ibun manah apai indai kitai laban sida mih pengering enggau pemun ba genap pengawa dikereja kitai ba dunya tu.