ICQS Tebedu deka digaga baru

TEBEDU: Kompleks Imigresen, Kastam, Kuarantin enggau Pengelikun (ICQS) Tebedu deka digaga baru enti udah bulih pemendar ari Menteri Besai Tan Sri Muhyiddin Yassin.

Taja pia, Menteri Dalam Menua Datuk Seri Hamzah Zainudin madah pemutus nya deka ditemu nganti penemuai Menteri Besai enggau Kepala Menteri Datuk Patinggi Abang Johari Tun Openg ngagai kompleks nya kena 26 Julai tu (Hari Minggu).

“Ari utai ke dipeda kitai udah bisi awak endur palan tu digaga manah agi jemah,” ku iya.

Iya madah munyi nya rambau ngabas ICQS Tebedu enggau Pengkalan Darat Tebedu (TIP) ditu kemari.

Sama bisi datai Kaban Parlimen Serian Datuk Seri Richard Riot enggau Ketuai Direktor Imigresen Malaysia Datuk Indera Khairul Dzaimee Daud.

Kenu ku Hamzah, penemuai iya endang dikena berati perambu ICQS Tebedu sekalika disambung tauka enda.

“Nya utai ke dikedeka kitai dalam timpuh seminggu tu, aku ngaga keretas kereja lalu meri ngagai Menteri Besai awak iya ngaga pemutus,” ku iya.

Sebedau tu, sebuah komiti ditumbuh dikena beratika sekalika palan nya patut digaga baru tauka enda ungkup ICQS Tebedu.

Berebak enggau nya, perengka TIP mega deka dikena manah dikena nyungkak pengawa dagang ari menua Malaysia enggau Indonesia.

Suara Sarawak