APIN lama ti udah, aku bisi makai reunion ba Kelab Golf Sarawak di Kuching enggau sekeda bakih aku ari Pom Lima Taun 1984 di Sekula Sekondari Sacred Heart, Sibu.
Lebuh makai nya, kami betanya ke berita pangan diri enggau bala bukai ti sama kelas.
Mayuh ari sida bakih aku nya bisi kompeni ke diri empu tauka gawa ngati ke diri baka nyadi luyar, lutur peribit, konsultan injiniring, konsultan rampa menua (environmental consultant) tauka konsultan pengelikun enggau pengerai pengawa (occupational security and health consultant).
Bisi dua iku udah nyadi tauke besai ari pemujur kompeni mekal spare parts bemacham bansa mesin besai enggau ngereja kunterik ngaga jalai sereta infrastruktur bukai.
Pengawa sida ukai di Malaysia aja, siku nyadi pakar beputung di Amerika Syarikat (AS) lalu ngentapka diri din enggau bini iya ti asal ari Vietnam, lalu bakih ti nyadi konsultan rampa menua nyau ka ninting bulan bejalai ngagai menua bukai baka Jipun ti begunaka servis iya.
Randau kami tebal agi pasal pengawa ti deka dikereja udah tu ila lalu sida madahka diri deka ngetu gawa, nyerah kompeni sida ngagai bala anak tauka orang bukai, mai bala diri sebilik raun ngagai menua tasik, main golf tauka ngamatka pengingin ati ngelama tu baka nemuai ngagai China.
Penyampau duit ti disimpan sida lalu beranakka puku ba Kumpulan Wang Simpanan Pekerja (KWSP) ngelama tu udah chukup kena sida ngidupka diri laban bini sida bisi duit simpan ke diri empu lalu bala anak udah gawa magang.
Kelimpah ari nya, rega public shares ti dibeli sida suba mega udah niki, ambi ke chunto 1,000 saham siti kompeni ti dibeli enggau rega RM1 siti saham ba taun 2000 diatu udah berega RM5,000, iya nya untung RM4,000.
Enti 10,000 saham, rega nya diatu RM50,000 enggau untung RM40,000.
Nya baru saham siti kompeni, tang sida bisi saham ba mayuh kompeni.
Sema jaku, enti sida bisi 10,000 saham ba tiap iti ari lima kompeni enggau rega ti sama baka rega saham kompeni ti dulu tadi, sida bulih RM250,000 diatu, untung RM200,000.
Nya bedau nyengkaum polisi insurans sida ti udah mansau (matang).
Ni enda bisi sekeda bakih aku nyau ka ninting bulan raun ngagai Eropah, AS tauka China.
Mit amat asai aku begulai enggau bala bakih aku nya laban sida udah nyulut ba pengawa sida kelebih agi ari sukut nyendiaka belanja ti chukup dikena sida idup pengudah enda ulih gawa agi ila.
Semua sida bakih sekelas aku nya bebansa China, kelimpah aku enggau siku bakih aku ti bebansa Melanau Mukah.
Dia aku meda baka ni budaya tauka adat bansa ti nemban, pemagas gawa, disiplin enggau pelajar pasal pekara wang meri empas positif ngagai bala bakih aku ti panjai runding.
DUIT SIMPAN ENDA CHUKUP
Baka mayuh peranak bukai di Malaysia, aku mega mansutka duit ari KWSP lebuh pandemik COVID-19 entara pun taun 2020 ngagai pun taun 2022 suba, ti ngujung ke duit simpan dikena melanja diri maya tuai ila enda chukup.
Skim mansutka duit khas ari KWSP belabuh dipejalai ba bulan April 2020 ti ngemendarka penyimpan mansutka RM500 sebulan ngelama 12 bulan.
Skim kepenudi ba bulan March 2022 natak duit ti ulih dipansut naka RM10,000.
Aku enggai mansutka duit simpan aku nya, tang kompeni lama endur aku gawa maya nya narit elaun kelimpah ngasuh kami kemisi enda begaji dua hari sebulan.
Bisi kompeni bukai muai pengereja pengawa pengudah setaun laban nadai duit agi dikena mayar gaji.
Bisi pengempu kompeni mansutka duit simpan sida ari akaun KWSP diri empu dikena nangkup kos bejalaika pengawa dagang ti majak nambah nyengkaum mayar gaji pengereja pengawa sida.
Moratorium utang ba bank ngelama setaun lebih suba enda diterang enggau nemban laban ke bendar moratorium nya semina ba bayar ansuran bulan aja.
Bungai utang tetap ditambah ninting bulan lalu timpuh utang mega ditambah.
Reti nya, utang sekeda orang ti manggai umur 60 taun ila dalam timpuh lima taun tu enda ulih dibayar ambis ti ngujung ke sida terus gawa ngambi bisi duit simpan enggau duit belanja.
Nitih ku ripot KWSP, 81 peratus penyimpan diatu dipelaba nadai chukup duit dikena melanja diri enti enda ulih gawa agi ila.
Urung RM145 bilion dikeluarka ari 8.1 juta akaun KWSP ulih peranak Malaysia lebuh pandemik suba.
Taja pen duit ti dipansut nya ngidupka mayuh peranak Malaysia, tang penusah dipelaba deka nyadi ba sida maya pinchin ila laban gaji mit, utang mayuh enggau umur panjai enda nyikap sida ke pengidup maya pinchin tauka enda ulih gawa ila.
Ba bulan Februari 2021, KWSP ngeripotka urung 30 peratus penyimpan udah mansutka nyau semua duit simpan sida dalam Akaun 1 ti sebedau nya semina ulih dipansut maya umur 55 taun.
Ba bulan March taun tu suba, Bank Menua Malaysia (BNM) madah, peranak Malaysia ari raban B40 enggau M40 dipelaba abis duit simpan 19 taun sebedau sida parai enti sida enda tegigaka pun penatai pemisi ti manah agi.
Naka bulan Disember 2022, 51.5 peratus ari semak 6.7 juta penyimpan duit ba EPF baruh umur 55 taun bisi duit simpan kurang ari RM10,000, nambah ari 4.7 juta penyimpan ti bisi penyampau duit ti sebaka naka April 2020.
Nitih kira KWSP ba taun 2022, semina urung empat peratus peranak Malaysia ulih ngetu gawa tauka pinchin.
Bisi sekeda penyimpan KWSP nyadi seranta pengudah pinchin, tang bisi mega sebedau pinchin udah seranta laban sida nadai kapasiti nampung penatai pemisi dikena ngidupka diri.
Bepelasar ke pemanjai umur peranak Malaysia, RM10,000 aja ulih disimpan enti pengereja pengawa semina ulih nyimpan kurang RM42 sebulan ngelama 20 taun.
Taja pia, RM145 bilion ti dipansut maya pandemik suba semina 15 peratus aja ari kesemua aset dipegai KWSP ti diatu berega RM1 trilion.
PENEMU ENDA DALAM
Taja pen duit simpan udah kurang, bisi sekeda orang politik minta perintah ngemendarka duit dipansut ngagai sida ti amat begunaka duit nya.
Tang siku pakar ekonomi enggau Ex-Kaban Parlimen, Nungsari A. Radhi bepenemu duit KWSP nya enda patut dipansut laban ujung iya sida ke pinchin ila deka napi penusah.
Ku iya, perintah ke bendar patut ngena agih belanja perintah meri bantu ngagai semua rayat enggau netapka pengelama sereta penyampau bantu baka ba skim bantu KWSP suba.
Menteri Besai ti mega Menteri Pekara Wang, Datuk Seri Anwar Ibrahim kala madah iya nadai perambu deka nampung skim pemansut duit simpan maya pandemik suba lalu penemu nya disukung KWSP.
Taja pia, perintah Anwar udah bisi perambu deka ngemendarka duit EPF nyadi gadai jali penusah ngenyit (emergency loans) laban rayat pedis amat bulih duit jali tauka loan ari bank.
Tang Nungsari enda setuju enggau perambu nya laban nya semina deka ngenusahka agi turu pinchin KWSP ti udah tusah nya.
Ku iya, kitai deka napi penusah besai ila iya nya orang tuai ti idup seranta.
Apin lama ti udah, Anwar bisi merambu nengah Bajet 2024 mungkal siti akaun KWSP baru ti ulih diakses pengereja pengawa lebuh bisi penusah ngenyit.
BUAI TI KERUH, AMBI TI CHIRU
Belabuh ari taun 2011, sida ti nyimpan duit ba KWSP bulih dividen pukulrata enam peratus setaun.
Nya siti ari pemeranak puku pemadu manah ungkup bala penyimpan KWSP lalu sida dilalau enda mansutka duit agi tang meruan nyimpan duit.
Perintah diatu benung nyerungkai jalai nambah penatai pemisi pengereja pengawa di Malaysia.
Gaji minimum ninting bulan ditiki ngagai RM1,500 ba bulan Mei 2022 lalu ba kompeni mit, atur gaji minimum nya belabuh dikereja ba bulan Julai taun tu tadi.
Perintah mega nyerungkai siti model gaji progresif, lalu langgur nya udah dibantai nengah Bajet 2024.
Baka di Singapore, gaji deka ditiki enggau chara progresif lalu kompeni tauka penggaji ti enda nitih atur nya deka diukum di baruh Akta Pekerjaan (Pindaan) 2022.
Taja pen pemutus mansutka duit KWSP suba ngasuh mayuh penanggul nyadi, penanggul nya mega ulih nyadi peluang belajar ke chara ngiga, ngaga enggau nyimpan duit.
Diatu meh maya iya kitai peranak Sarawak, kelebih agi peranak Dayak, belajarka pekara wang enggau engkeman sereta nemban.
Titih meh bansa bukai ti landik ngiga duit lalu ngembuan disiplin nyimpan duit tang anang titih enti sema pengawa sida enda ngena chara ti dikemendar undang-undang.
Buai meh ti keruh, ambi meh ti chiru.
Sama-sama meh kitai belajar pekara ti manah ari orang bukai enda ngira bansa, adat tauka jalai pengarap ngambi kitai bediri sama tinggi lalu duduk sama baruh enggau bansa bukai.
Anang ngumbai diri pandai agi, berani agi, besai agi tauka bisi agi hak ari orang bukai laban enti kitai ngeninggika diri tang nadai utai ulih (bodoh sombong, ku orang Melayu), kitai semina ngemaluka diri aja lalu diketawa bansa bukai.
Bansa ti mansang mujur sereta nyulut endang bansa ti meruan belajar, baruh ati, bebasaka orang bukai kelebih agi sida ke tuai, ngembuan disiplin tinggi, bisi pengasih ke orang bukai, bagas gawa sereta taluk ngagai Petara Pemadu Besai.
