iGPS meri pemaik ngagai 31, 285 anak Sarawak

KUCHING: Inisiatif Graduet Pulai Sarawak (iGPS) ungkup nembiak ari Sarawak ke belajar ba palan pelajar tinggi (IPT) di Semenanjung Malaysia, Sabah enggau Labuan deka meri pemaik ngagai 31,285 iku nembiak.

Penyanding Penemu Sarawak Volunteer Fazzrudin Abdul Rahman madah ungkup taun 2020, urung 13,167 peminta udah dikemendar lalu beungkus RM3,830,700.

“Kenyau program tu ditumbuh 2019, bisi 31,285 peminta diterima naka Disember 2020. Penyampau belanja ungkup iGPS naka ujung taun nyin kemari iya nya RM9,266,100.

“Naka tu, iGPS agi bejalai baka selama taja menua agi dalam timpuh Atur Mindah Betagang (PKP).

“Program ke dibantai 2019 datai ari penemu Kepala Menteri Datuk Patinggi Abang Johari Tun Openg betuju ngelempungka tating belanja nembiak Sarawak ti deka pulai ke nengeri tu,” ku iya nengah sebengkah penerang kemari.

Fazzrudin ke mega Adun Tupong madah nengah inisiatif iGPS, perintah nengeri udah meri subsidi tiket bilun penyampau RM300 siku ungkup pemulai ari Semenanjung Malaysia, Sabah enggau Labuan ke Sarawak.

“Entara lebas bulih subsidi iGPS iya nya peminta mesti rayat Sarawak beumur 18 taun ke atas, belajar penuh ba sebarang IPT di Malaysia ke berejister ba Opis Menteri Pelajar.

“Siku nembiak ulih ngaga peminta dua kali dalam setaun. Sida ulih nganjung peminta nengah lawan web Yayasan Sarawak,” ku iya.

Ku iya mega, peminta mega ulih digaga nengah aplikasyen telefon pintar Aplikasi Yayasan Pelajar Sarawak tauka iOS (Apple App Store) sereta Android (Google Play Store).

Penerang silik pasal iGPS ulih dipeda ba laman media ramaFacebook Sarawak Volunteers tauka betelefon nuju 011-3322 1107 maya opis dibuka.

Suara Sarawak