SIBU: Semangat sereta pengeransing niang Barbara Mendu Bay meseti ditunda semua kaban Sarakup Indu Dayak Sarawak (SIDS) nentu ke organisasyen nya bejalaika tanggungpengawa ungkup raban indu Dayak ba menua tu.
Sapit Menteri Pengerai Mensia Mayuh, Pengawa Berumah enggau Perintah Lokal, Michael Tiang Ming Tee madah, niang nya pemungkal enggau presiden keterubah SIDS ba taun 50-an.
“Presiden SIDS ti keterubah nya (niang Barbara) ikon indu Dayak.
“Semangat enggau pengeransing meseti nyadi chunto enggau chuan ngagai SIDS nempa mayuh agi pemujur ngagai komuniti indu Dayak,” ku iya.
Tiang mansutka jaku nya lebuh bejadika Seminar Betanam Betupi enggau Aum Besai Ninting Taun (AGM) SIDS Pampang Sibu Ke-31 empai lama.
Tiang ke mega Adun Pelawan madah taja niang Barbara ari ruang bilik jelan iya tang iya chukup besemangat mungkal SIDS dikena ngenyemak ke diri enggau indu Dayak.
Ku iya, nengah SIDS nya iya mantu raban indu Dayak nengah pengawa matih sida nyadi tuai, pedagang enggau raban ti ulih gawaka Sarawak ba taun 50-an.
Iya madah niang Barbara enda kala ngasai ke diri indu tauka Dayak ti bisi pengurang.
“Niang Barbara udah ngati ke diri, besemangat enggau chukup siru ke rayat Sarawak ti beguna ke bantu lebuh jeman Perang Dunya Kedua kelia.
“Semangat dikembuan niang Barbara patut ditampung ba jeman ke-21 ngambi meri peransang enggau negapka semua kaban SIDS,” ku iya nyemetak.
Ba jaku pengelalu, Presiden SIDS Datuk Ir Alice Jawan Empaling meransang kaban SIDS berani nambah penemu ungkup pemaik diri empu sereta komuniti.
Alice Jawan ke mega Sekretari Mendam Opis Menteri Pengangkut Sarawak ngarap ke kaban sereta indu Dayak berani ngaul diri enggau nyukung bemacham program perintah ti udah dilanggur.
Iya mega ngingatka pugu strategik SIDS ti beguna ke sukung semua kaban.
Ba pengawa nya, Tiang udah ngemendar geran penyampau RM5,000 ngagai SIDS Pampang Sibu dikena ngatur aktiviti. Sama datai Chairperson SIDS Pampang Sibu Angelyn Uchi Maseng sereta 135 iku kaban.
