SERIAN: Projek numbuhka Institusyen Latih Industri (ILP) Serian disadang tembu tengan taun 2022 tu ila deka nerima 700 nembiak ninting taun.
Duta Khas Menteri Besai Ke Jipun, Korea Selatan enggau Taiwan, Datuk Seri Richard Riot Jaem madahka penembu ILP Serian tu deka meri peluang ngagai nembiak Sarawak belajarka pengelandik teknikal.
“Naka tu, projek nya lanchar dipejalai. Kebendar iya, projek tu tembu kena 31 Disember 2021 tang dilanjar ketegal pandemik Covid-19.
“Aku ngarapka projek tu ulih tembu tengan taun 2022 ngambi menua ulih nempa modal mensia ti landik.
“Pia mega, pekara tu mantu Sarawak nyapai status menua maju manggai taun 2030,”ku Kaban Parlimen Serian nya.
Riot mansutka jaku nya lebuh dirandau pemberita pengudah bejadika Projek Nyeleti Palan Paking Kerita Sekula Sekondari Perintah (SMK) Serian, kemari.
