Import produk, dagin jani ari Sabah ditagang nagang ASF ngerekai

KUCHING: Sarawak neritka atur nagang import jani enggau produk dagin jani ari sabah.

Atur nya diterit berindik ari lapan ari 13 chunto dagin ari Pitas, Sabah ditemu positif igi penyakit dikumbai Tabin Jani Afrika (ASF).

Sapit Kepala Menteri Datuk Amar Douglas Uggah Embas madahka, Sarawak diseliah ari pengerekai igi penyakit nya.

Iya mega ngelalau mensia mayuh anang meli tauka mai dagin enggau produk jani ari Sabah tauka ari menua sepiak.

“Atur nagang nya dipejalai nengah Seksyen 8 Ordinan Kesihatan Awam Veterinar Sarawak 1999.

“Barang sapa ditemu ngelanggar atur tu tauka import jelu tauka produk jelu nadai permit (Seksyen 9), kita ulih diukum manggai RM50,000 tauka dijil dataika dua taun,” terang iya.

Uggah ti mega Menteri Betanam Betupi Moden, Tanah Adat enggau Pemansang Kandang Menua madahka Opis Servis Veterinar Sarawak (JPVS) mega deka neritka atur pengelikun di menua tu kelebih agi di Limbang.