ARTIKEL

SILIK… Phyllis chukup silik maya nusuk leka marik ngambi semampai kemas sereta manah dipeda.

Indai nyadi peransang Phyllis mekuh pengawa dagang

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

JAKU peransang sereta jalai pengidup indai nyadi peransang ngagai Phyllis Tobi, 51 ngaul pengawa dagang.

Indu Bidayuh asal ari Puncak Borneo nya madah, semangat indai nyadi sempun iya ngaul diri ba dunya dagang ari suba nyentuk diatu.

PUN PERANSANG
Terang Phyllis, indai iya (Nayos Biat) siku orang ti nadai nemu jenuh, iya nanam sayur nyadi duit, nanam chabi nyadi duit, semua pengawa dikereja iya ulih nyungkak penatai pemisi.

“Aku nadai kala meda indai minta duit ari apai laban iya nemu ngiga belanja kediri empu.

“Taja diatu umur iya udah manggai 73 taun tang indai aku agi puh bedajaka lemang, nanam enggau nyual sayur kelimpah nyait baju Bidayuh,” ku iya lebuh dirandau Suara Sarawak.

Semangat indai ti puh bedagang meransang Phyllis nunda singkang indai ti dikesayau iya mekuh pengawa nya.

Seraya nyerita peneleba diri keterubah ngaul pengawa dagang, Phyllis madahka iya berengkah nyual produk ari leka marik di mua pagar Palan Jelu Siga Semenggok.

“Aku datai kia muka pintu bonet entukar, nya meh keterubah aku bejualka produk ari leka marik dalam taun 2010 suba.

“Ari nya orang berengkah ngelala aku, sida ngambi lumur telefon aku lalu enti bisi program tauka pengerami, sida ngangauka aku datai bejual,” ku iya.

NYUNGKAK KREATIVITI

PHYLLIS TOBI


Ku Phyllis ti teperansang meda semangat enggau pengeransing indai bedagang, iya pen lalu nguji ngaga bemacham produk asal bansa Bidayuh ari leka marik ungkup dijual.

“Aku ngembuan minat ngaga enggau ngasilka chura produk leka marik ti baru ngambi bebida ari produk sebaka ti digaga orang bukai.

“Ari nya, aku nemu siti chura ti pemadu dikerindu mensia mayuh ti dikumbai aku marik ‘buak’.

“Reti leka jaku ‘buak’ dalam jaku Bidayuh iya nya buah, diatu aku bisi antin buak enggau lukit buak,” ku iya.

Iya nyemetak madah, produk leka marik ti digaga iya nadai tentu jauh bebida ari produk leka marik orang bukai semina chura enggau kreativiti orang ti ngaga aja bisi bebida.

Ku indai ngagai tiga iku anak nya, iya mega bela nyual asil kraf jari orang bukai ti bela datai ari pelilih Padawan dia.

TIMBAL MANAH
Produk antin enggau lukit ti digaga Phyllis ari leka marik nerima timbal manah ari mensia mayuh kelebih agi rambau musin pengerami tauka program ti diatur perintah.

Phyllis madah, penatai pemisi diulih iya sebulan ari pengawa dagang nya abis nadai urung RM200 aja tang lebuh musin pengerami tauka bisi program iya deka bulih mayuh untung.

Ambi ke chunto, ku iya, baka rambau Bazar Gawai ti diatur Majlis Bandaraya Kuching Selatan (MBKS) ba taun nyin kemari iya mujur ngulihka penatai pemisi manggai RM7,000 ba timpuh 10 hari aja.

“Nya alai, aku ngarapka perintah tauka sapa-sapa ulih ngatur mayuh agi program baka bazar lalu ukai semina rambau Hari Gawai aja ngambika kami ti bejalaika dagang baka tu ulih nambahka penatai pemisi,” ku iya.

Tampung iya, duit ti diulih iya ari pengawa dagang nya deka disimpan ungkup guna jemah sereta bisi mega dikena meli barang ti diguna ninting hari.

“Lebuh bisi penanggul baka pengerekai igi penyakit COVID-19 empai lama, penatai pemisi ari pengawa dagang aku ngelama tu meh dikena aku nampung belanja kami sebilik.

“Aku gaga ulih megai duit diri empu sereta enda kiruh minta duit ari laki.

“Nya alai, aku nadai jenuh, dalam sehari abis nadai dua nyentuk tiga jam aku meseti nusuk leka marik,” ku iya.

NGEREMBAI DAGANG

TEMEGAH… Phyllis temegah mandangka produk leka marik ti digaga iya empu.


Kelimpah bejual produk leka marik, Phyllis mega bisi bejalaika dagang rumah temuai ba Kampung Giam, Jalai Puncak Borneo.

“Taja penatai pemisi aku ari pengawa ngaga marik tu besai tang dagang rumah temuai nyadi pelasar dikena aku ngelakuka produk leka marik diri.

“Dagang rumah temuai tu laku tauka mayuh peminta maya ujung minggu tauka rambau pemisi,” ku iya.

ANDAU PENGUJI
Phyllis madah, pengerekai igi penyakit COVID-9 nyadi penanggul pemadu besai ditapi iya laban enda ulih bejalaika pengawa dagang.

“Maya nya, orang nadai ngatur program tauka pengerami, nya alai, aku nadai ulih bejualka produk diri lalu dalam kandang dua taun aku nadai penatai pemisi.

“Tambah mega, aku jarang enggau orang bekenaka pelasar media sosial dikena ngelakuka produk diri laban teleba bejual maya bisi pengerami sereta betunga mua,” ku iya.

Taja pia, diatu Phyllis berasai gaga laban penatai pemisi iya udah pulai baka selama pengudah pengerekai igi penyakit nya udah nadai agi.

TIBAR PERANSANG

SEPENEKA MILIH… Sekeda produk leka marik digaga Phyllis ti bemacham bansa enggau chura.


Phyllis bela ngelalau mensia mayuh kelebih agi bala indai tunggal enggau sida ti gawa ngintu ruang bilik ngambi ngemansangka pengelandik dikembuan sida.

“Anang masau tauka meram pengelandik kita pia aja tang nya meseti dikemansang laban ulih ngerandang dagang enggau nyungkak penatai pemisi tambah.

“Aku meransang semua kitai ti gawa ngintu ruang bilik, kitai anang semina diau jenuh aja laban kitai enda nemu nama utai ti deka nyadi pagila lusa.

“Sehari tu engka kitai gaga tang pagila kitai enda nemu nama utai tau nyadi.

“Ambi ke chunto baka pengerekai igi penyakit COVID-19 empai lama, nadai siku kitai nemu lalu asil diulih ari pengawa dagang tu ulih mantu kitai nampung belanja ruang bilik diri.

“Nya alai, kitai meseti semampai ngadang, nyikap diri sebarang maya sereta pintar ngiga belanja kediri empu lalu enda bepanggai penuh ba gaji laki aja,” ku iya nyemetak.

BERITA LAIN

Pemansang asil nagih MA63

MIRI: Pemansang besai ti udah dijapai Sarawak kandang beberapa taun ke udah asil ari nagih hak di baruh Sempekat Malaysia 1963 (MA63). Kaban Kunsil Nengeri

Solar melepung HEP Batang Ai

BATANG AI: Projek ladang solar melepung diu Tekat Hidroelektrik (HEP) Batang Ai deka dikerembai, ngena 60 peratus ari 8,500 hektar pemesai tekat ai nya. Premier

BERITA TERBARU