Indai tunggal meseti berani nempuh penguji

“Anang peduli ngagai jaku orang ti deka ngemaruhka kitai, tang patut berani nempuh semua penguji ngambika kitai tan sereta liat ati napi pengidup ti menyana jemah.”

KUCHING: Pemar ditapi nyadi indai tunggal nupi tiga anak kelimpah ngemeranka tanggungpengawa nyadi pemesai polis, enda ngemuntanka pengeransing Bibiana Manggai, 42 taun nembuka pelajar ba tikas Ijazah Doktor Falsafah (PhD).

Indu asal ari Kampung Bait Ulu, Sri Aman tu ti benung gawa ba Unit Pematih Polis di Bukit Aman.

“Berebak enggau pengawa aku nyambung sekula baru mayuh amai penguji ti nuntung kekadang bisi maya aku ngasai diri lemi.

“Tang bepegai ba jaku ‘nadai jalai muntang nyema deka mujur dalam pengidup’ ngasuh ati aku liat,” ku iya madah ngagai Suara Sarawak.

Bibiana Manggai

Bibiana bekunsika pemar ti ditapi iya lebuh nyambung sekula sereta ngatur bala anak ti agi mekang, madah pengidup iya bepun diuji ketegal pemidang laki dikesayau.

Mulaika pengingat terubah gawa menya iya madah, kena 1998 iya dipilih nyadi Konstabel Indu Polis Diraja Malaysia (PDRM) ba palan pematih Pulapol Kuching sepengelama enam bulan sebedau bepun gawa ba Indu Opis Bagi Menua (IPD) Serian.

“Ba taun 1999 aku nguji ngerejister nyambung sekula PJJ di UiTM Kota Samarahan ngambi Diploma Pengatur Mensia Mayuh (Public Admin) mujur lalu tembu 2005.

“Maya nya meh aku diuji enggau pemidang laki ti dikesayau tang aku enda putus pengarap, agi deka nyambung pelajar ngambika pengidup kami menyanak lebih meruan.

PATUT DICHUNTO…Bibiana mujur nembuka pelajar tikas PhD kena 1 Julai tu tadi.

“Udah nya, ba taun 2006 aku nerima kangau niki pangkat ngagai KPSL ti mai gelar Inspektor Polis lalu bulih pengawa nyadi pematih di Maktab Polis Cheras urung sembilan bulan sebedau aku gawa ba Pampang Trafik Johor Bharu,” ku iya.

Maya nya iya chukup ngasaika pemedis ngidupka diri laban jauh ari menua lalu nupi tiga iku anak seraya gawa.

“Enda ngetu ngapa aku terus ngerejister belajar ngambi PJJ di Universiti Teknologi Malaysia (UTM) Johor ba taun 2007 ngagai 2011 sepengelama empat taun ba bidang Pemansang Penguasa, Pemayuh Tubuh enggau Pengereja Pengawa (HRD).

“Taja mayuh pemar pengidup ti ditengah, aku tetap meri terima kasih ngagai petara laban aku ulih magi jam begulai enggau bala anak seraya nyadi Pemesai Pemansik Trafik sereta nyadi siku pelajar.

“Ukai muntang aku napi pekara tu kediri kelebih agi aku siku indai tunggal tang aku endang mantul ati,” ku iya.

ANANG MANTUL BELAJAR…Bibiana Manggai (tiga kanan) begulai enggau balai bukai.

Udah nya, Bibiana madah kena 2013 iya dikangau nyambung sekali agi PJJ di UTM ngambi Master HRD sepengelama dua taun lalu tembu nitihka timpuh ba taun 2015.

Ku iya, pekara ti nyadi pelasar iya lebuh besekula iya nya meseti milih bakih ti manah enggau begulai.

“Bakih ti dipilih patut ngembuan ati liat sama deka belajar laban nyema salah milih bakih kitai deka tinggal ke belakang.

“Aku ngaga semua tu semina ungkup anak aku magang laban aku deka meransang sida mujur besekula jemah,” ku iya.

Nangkan nya, ba taun 2015 iya lalu bulih nyambung pelajar PhD ba bidang ti sama mega ke alai iya tembu kena 1 Julai 2019 tu tadi pengudah mujur ngambi peresa Viva.

“Aku kala berasai lemi maya belajar enggau mayuh penguji dataika aku ngasai nadai nemu tuju diri.

“Pengelelak, enda chukup tinduk semina dua ngagai tiga jam sehari, ngintu anak besekula enggau ngatur belanja kami sebilik meransang aku bebendar agi nembuka pelajar diri.

“Kelebih agi lebuh anak tuai aku mujur nyambung belajar ba UTM Johor ngambi Diploma Medical Injinir ngasuh aku temegah laban kami duai sama belajar dia,” ku iya.

Ba pengujung randau dia iya ngelalau bala indai tunggal ngambika enda putus pengarap ngapa tang terus maju ke mua ngatur pengidup diri empu taja dituntung penanggul.

“Anang peduli ngagai jaku orang ti deka ngemaruhka kitai, tang patut berani nempuh semua penguji ngambika kitai tan sereta liat ati napi pengidup ti menyana jemah.” ku iya.